1985 kha rei tawh tak a ni; 1985 atanga khawlai tifaitu nih theih hi, eizawnnana hmang tan pawh thil lawmawm a tling ang a, eizawnna ni lo, rawngbawlnaa ngaia chutiang hna thawh ngar ngar ngar chu a lawmawm mai ni lovin thil mak a tling ang.
Chutiang mi chu an awm; Zotlang venga C Lalrinthanga chuan 1985 atang khan veng tihfai hna a thawk tawh a, khawlai a phiat, lui kawr a tifai, hnim a sam, pit latrine thli a tihfai chang a awm, chutiang chuan kumin thlengin a remchan dan ang angin a thawk thin.
Amahin beihpui te a thlak hluai a, a tir lamah chuan amahin a “hnatlang” thin. A hnu lamah chuan hnatlanpui tur a nei tawh a, 2017 atang chuan sanitation volunteer, naupang rual nen an hnatlang thin. Tunah chuan patling pawh an tel a, Inrinni pawh khan puitling pasarih vel nen vantlang zun in an tifai a, naupangin hmun an phiat bawk.
Faina chungchangah hian Himalaya tlanga “piangthar” a ni a, 1984 khan mountaineering (tlang lawn) a zir a, chuta an zir lai chuan ei tur funna kawr bawlhhlawhbawm ni lova paih thin an hrem thin. An hotupa a tawng chhuak ta a, “Hetiang duh dan dana in paih zel chuan kan tlang ropui tak hi bawlhhlawhbawm lianpuiah a chang dawn asin,” tiin. Chu tawngkamah chuan a inhmuchhuak ta a, faina leh thianghlimna lama theihtawp chhuah a tum ta a ni.
1985-ah an veng Zotlang-ah a thiam ang angin a tan a, chung lai chuan veng chhung kawng pawh ‘black top’ loh, lei khu a la ni. Hnam dang thenkhat phei chuan pit latrine an la hmang a, kawngpuiah a thli a luang thin. Then ngai leh tihfai ngai chu a hma tawp mai a, mahniin a “hnatlang” ta thin a ni.
“Mahniin ka’n ti ve tawp mai a, ka huphurh em em mai a. Ngam leh ngam lovin mi inah te ka leng a, faina chungchang te ka sawipui a,” a ti a, “Tlangval, la naupang tak kan ni a, chutianga hma ka’n la ve ringawt mai chu mi pawhin mak an ti a. Awmkhawmna vela an kalsan hnawmhnawk han then te hian an nuih a za a, mi khan min nuihzat thin tak tak a,” a ti bawk.
2000-ah khan chung laia zirtirtu hna a thawhna Zotlang Middle School-ah Scouts and Guides an din a, a kaihhruaina hnuaiah faina lamah anni hian an thawk thin. Kohhrana Social Front Committee-a a tel pawhin faina lam an ngai pawimawh a, an veng VC hnuaia Sanitation Committee secretary niin theihtawp a chhuah thin bawk. YMA hruaitu a nih lai pawhin faina leh thianghlimna lam a ngai pawimawh a, 1991-98 chhunga OB a nih pawhin chumi remchanga la chuan faina leh thianghlimna lamah theihtawp a chhuah thin. 2017 July ni 1 atang phei chuan sanitation volunteer an awm ta a, Inrinni apiangin faina beihpui an thlak thin.
Faina leh thianghlimna hi mihring tan a pawimawh tih chu a thupui a ni a, “Chawimawina beisei ni ta ila, thla hnih pawh ka tih ang hi ka ti peih ang em aw?” a ti.
Zak tak, zam tak chungin bul a tan a, tunah chuan he hna hi Pathian pekah a ngai. “Pathian min pek a lo ni. A tir lamah kha chuan beidawn chang te pawh ka nei a, kum tharah chuan ka ti tawh lo ang ka ti ziah. Mahse thawhpui leh phurpuitu tha tak ka nei ziah a, remhriatna thar a awm ziah bawk a, ka bansan thei lo,” a ti a, “A hma chuan mi chunga lungawi lohna te pawh ka nei thin a, mi dang phutna te pawh ka nei thin a, hah reng rengin hun ka hmang thin. Chutiang chu a bo ta vek a,” a ti bawk.
A tawn chin atanga a thlirin faina leh thianghlimna lamah mipuiin hma an sawn a ti a, “A hma kha chuan miin ‘Kan kawt hi rawn tifai rawh u,’ an ti thin a, tunah chuan an in bul vel kan tifai ang tih an hlau tawh,” a ti.
A tifaitua a bakah dan leh inkaihhruainate a siam a, chung chu thenkhat chuan an lo haw thin. Mahse a lo huate pawh chu rei lo teah a phur phurah an tang a, hnatlannaa hman tur sum thawhtuah te an tang thin. “Hma kan sawn a, kan hmasawnna hi hmuh hmaih rual a ni lo,” a ti.
2022 Krismas dawn khan beihpui a thlak a, “Kan Pathian hi thianghlimna hmanga chibai buk a hun a ni,” tiin, a theih ang angin hma a la a, kum tharah pawh a la chhunzawm ta zel.
‘Terina’ tia koh C Lalrinthanga hi an veng Zotlang Branch YMA te’n nikum YMA Day-ah khan chawimawina an hlan a, a hmain a awmna section-in an lo hlan tawh bawk.