Daily Newspaper

Khawlaiah sikul naupang

10

Mizoramin thla nga thla ruk vel lai sikul naupang a hmuh loh hnu-ah tunlaiin khawlaiah sikul naupang hmuh tur an awm leh tan a, tam phei zawng an ni lo.

Thla ruk vel chu Mizoramah sikul khar a ni hman a, India sorkarin September ni 21 atanga zirna in hawn a phal avangin Mizoram sikulte pawh an inhawng tan. Kar hmasa lamah khan sikul thenkhat chu hawn a ni tawh a, khawpuiah leh thingtlangah sikul inhawng hi an pung hret hret nia hriat a ni.

School education department hotute chuan sikul engemaw zat chu hawn a nih tawh thu an sawi a, a ruala tam tham hawn huk tumna a awm loh thu leh zawi zawia hawn tur a nih thu an sawi.

Zirtirtu, hrilen vanga mahni khuaa hawte chu an thawhna khuaa kir tawh tura hriattir an ni a, mahse Aizawl atanga khaw danga thawkte’n harsatna an thawh thu sawiin department hotute chuan, tunlaiin khaw hrang hrangin Aizawl mite nena inchiahpiah loh an duh avangin, zirtirtu Aizawl atanga haw turte pawh an thlen hunah inkhung hrang (quarantine) tura an tih avangin zirtirtu mahni thawhna hmuna kir thei lo an awm tih an sawi.

Education department director James Lalrinchhana chuan sikul hi hawn ni mah se inkaihhruaina leh inkhuahkhirhna a awm thu a sawi a, kal dan pangngaia kal tur a nih loh thu, zirlaite’n an zirtirtute an rawn duh a nih chuan nu leh pa emaw guardian emaw phalnain sikul-ah zirtirtute hi an va pan tur a nih thu te, zirtirtu pawh an vaia an kal loh thu leh 50% bak kal phal a nih loh thu a sawi.

“Class an kal lo a, zirlaite hi class room-ah an va thu thup lo a,” a ti a, “SOP a awm a, chu chu zawm ngei ngei tur a ni. Zirlaite leh zirtirtute himna tur ngaih pawimawh tur,” a ti bawk.

“Regular class kal tur a ni lo a, hostel pawh luh rih loh tur. Dan zawm chungin zirlaite leh zirtirtute hi sikulah an kal tur a ni a, kan him tlanna tur kan ngai pawimawh,” a ti a, “Tuna kan hriat theih chinah chuan sikul hawn hi a hlawhtling a, zawi zawiin sikul hi hawn a ni a, zirlaite pawhin an hlawkpuiin kan hria a, zirtirtute pawh an tang,” a ti bawk.

Chutih rual chuan thla thara kal dan tur sawi lawk theih a nih loh thu a sawi a, sorkar laipuia ministry of home affairs-in September ni 21 hnuah zirna inte hawn a phal thu leh chu chu September thla tawp thleng tur a nih thu sawiin, October atana inkaihhruaina an duang leh dawn a, chu chu Mizoram pawhin a ngaichang tih te a sawi.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy