Khawlum vangin mi 192-in nunna chan

Khawlum turu lutukin northwest India a nuai zelah temperature in 40 degree a kai chho zel a. National capital Delhi chu a tuar nasa ber zingah a tel.
June 11-19 inkar chhungin khawlum lutuk avangin homeless mi 192 in nunna an chan tawh niin Centre for Hoslitic Development, non-governmental organization te chuan an sawi.
Police te chuan Ningani khan darkar 48 chhungin mirethei tak tak ruang 50 an hmuh thu sawiin heng mite hi khawlum lutuk kaihhnawih avanga nunna chan vek an ni em tih erawh an sawi chaing lo thung.
Homeless-te tana thawk ber NGO te chuan darkar 48 chhunga nunna chan zinga 80% te chu homeless te an ni an ti ve thung a.
“Heatwave chuan khawsak harsa sa tak homeless te dinhmun chu a tichhe zual a, a bik takin khawlum lutuk kaihhnawih avanga natna hrang hrangte chu intihdaihna hmun mumal te an neih ve loh avangin an tuar nasa zual a ni” tiin NGO te chuan an sawi.
Hospital-te pawhin khawlum kaihhnawih avanga nunna chan tun ni hnih chhungin a san thu an sawi bawk a.
Safdarjung Hospital chuan darkar 24 chhungin khawlum kaihhnawih avanga nunna chan 13 an awm thu sawiin khawlum kaihhnawih avanga damdawiin a dahluh ngai mi 33 an neih thu an sawi bawk.
Delhi-a hospital lian pathum RML Hospital, Safdarjung hospital leh LNJP hospital te chuan a hma ni pawhin khawlum kaihhnawiha nunna chan 20 an neih thu an sawi.
Thawhlehni zan khan Delhi khawpui zan lam temperature chuan 35.2 degree Celcius hawlhin kum 14 chunga zanlam boruak lum ber tum a ni bawk.
Delhi-a Sir Ganga Ram Hospital-ah pawh heatstroke case awmin heng bakah hian heat cramps leh heat exhaustion te pawh a tam niin Dr Atul Kakar, Department of Internal Medicine chuan a sawi.
Heatwave chuan lupus, systemic lupus erythematosus, autoimmune disease chu a tihluar tia sawi a ni bawk a, Heng case nei te 10 zinga paruk vek te chuan skinm joints leh kidney lamah harsatna an tawk zel tia sawi a ni bawk a.
Lupus hian a bik takin hmeichhia naupawm thei chin kum 15 atanga 45 te a khawih nasa zual tiin Dr Lalit Duggal, senior consultant of rheumatology and clinical immunology, Sir Ganga Ram Hospital chuan a sawi.