Speaker bangla kawta thingkih chungchang Assembly Speaker-in Green Mizoram Day hman a nih tuma a sawifiahna, “dan ang thlapa an kalpui hnua thing chu kih” tia a sawi chu, Centre for Environment & Social Justice (CESJ) chuan an hriatthiam loh thu an sawi a. “Dan an zawm loh avanga PWD paw’n pawisa an chawi laia Speaker berin dan anga an kal thu a sawi tlat hi insawifiah ngei turin kan phut tlat a ni” an ti a.
Assembly Speaker hian, Speaker bangla leh a compound chu PWD enkawl leh an kuta awm a nih angin PWD hotuten bangla kawta thingkung ding chu a awmna hmun a hmawr bakah lungrem bulah a awm a, tunhnaia thlipui leh ruah sur nasat lai khan a dinna zawn phei vel a khi nasa a, a bul vela chengte tan a him loh avangin leh a dinhmun a derthawn avangin kih an rawt tih a sawi a, a tul anga pawisa deposit ngai te deposit-in dan ang thlapin an kalpui hnuah thing chu kih a nih thu a sawi a. Hemi chungchanga Speaker thusawi hi sawrkar press release-ah tarlan a ni.
Sawrkar huaihawt programme pawimawh takah Speaker hian hemi chungchang hi a sawi chhuak a ni a; CESJ lamin Speaker thusawi dan hi an hriatthiam loh thu leh sawifiah tura an phut thu tun hnaia an rawn auchhuahpui ve leh nghal avang hian, mipui hnena thudik tak hai lan chu tihmakmawh a lo ni ta a ni.
Thing ding hi a bul vela chengte tan a him lo a nih chuan, thing kih chu mipui himna tura hmalakna a nih avangin, thing ding lai chu uiawm hle mah se, mihring tana chhiatna thlen thei a nih dawn ai chuan senghawi mai chu tih dan tur niawm tak a ni. Chutiang na na na chu hriatthiam loh tur pawh awmin a lang lo.
A lehlamah CESJ chuan, thing kih a nih chungchangah, dan palzutna a awm avangin department of EF&CC-ah complaint an thehluh thu te, PWD lam chu phalna nei loh an nih avanga chawitir an nih thu te an sawi ve thung a.
Thing kih a nih chhan, ‘safety measure’ anga Speaker-in a sawi hi a lo dik a nih pawhin, dan palzuta thiltih a nihna lam hi CESJ-in an rawn charge-na a ni deuh ber a; thing ding chu mihring tana hlauhawm a nih leh nih loh lam an rawn buaipui em em lo niin a lang.
Pakhatin ‘dan ang thlapin’ a ti a, a lehlamin ‘dan palzutin’ an ti ve thung a. Dik lo chu a awm ta a ni. Thu inkalh a awm hian dik zawk leh dik lo zawk a awm a, ‘dik ve ve’ emaw, ‘dik lo ve ve’ emaw tia chalrem ngawt chi a ni lova. Dik chu dik, dik lo chu dik lo, a ni mai tur a ni.
Dikna hi a lal ber a, a zahawm ber a, mihring hian kan dah lalin kan zah ber tur a ni. Tuna thu inkalh deuh pahnih, vantlang/mipui hmaa auchhuahpui a ni ta hi, a eng zawk nge thudik tih hriat hi mipui right a ni a, Dikna hi a lal ber tur a ni.
Khaw’nge Dikna chu?
