Daily Newspaper

Khawpui 118 zingah Aizawl boruak a thianghlim ber

10

India ram khawpui 118-a boruak thianghlim dan – Air Quality Index (AQI) tehnaah Aizawl chu a thianghlim bera ngaih a ni a, a dawttu chu Shillong a ni.

Central Pollution Control Board (CPCB) chuan India ram khawpui hrang hranga pollution nasat dan hi a vil reng a. Hemi ang hian khawpui boruak thianghlim dan hi a tichhuak reng a ni.

December 2 tlai dar 4:00 a tihchhuahah Aizawl chu khawpui 118 zingah hian boruak a thianghlim berna a ni a. Air Quality Index (AQI) a teh danah hian 0-50 inkar chu ‘a tha’ a tih zingah telin, hemi huam chhungah hian khawpui 5 chiah an lang a, index value-ah Aizawl hi 14 niin a hniam ber a, a dawttu Shillong hi 26 a ni.

AQI teh danah hian good (0-50) bakah 51-100 chu tha thawkhata ngaih a ni a, 101-200 chu a vantlang (tha tih tur ni lo, a chhia a chhiar tel ni chiah lo) a ni a, 201-300 chu ‘tha lo’ a dah a ni a, 301-400 chu tha lo hle-a dah niin, 401-500 chu tha lo uchuak taka dah a ni.
December 2 kha pollution venna ni – ‘National Pollution Prevention Day a ni a. He ni denchhen hian Mizoram Pollution Control Board (MPCB) chuan thuchah siamin, tui, boruak leh kan chhehvel tithianghlim zel tura tan laktharna ni atana hmang turin mipuite a sawm tih a sawi.

‘CPCB-in boruak bawlhhlawh dan a tehna – Air Quality Index thar berah India ram khawpui 118 zingah Mizoram khawpui Aizawl chu khawpui boruak thianghlim ber a ni a. He dinhmun kan hauh theih chhan hi mipui thawh hona leh thuawihna rah a ni a, Covid-19 dona kawnga kan hmalakna chak tak avangte, bawlhhlawh paih dana hma kan sawnna te, lirthei khu leh industry atanga boruak chhia chhuak tur venna kawnga tan lakna avangte a ni,’ a ti.

Kan ram boruak, tui leh chhehvel dinhmun a that zel a, thianghlimna kawnga hma kan sawn zel theih nan MPCB chuan tha thlah loa tangmar reng turin mipuite a ngen tih sawiin, ‘Bawlhhlawh neih tlem te, a paih dan sawrkarin a ruahman ang zawm that te, plastic lam chi hman tlem leh hman nawn uar te, lirthei khu chhuak a hun taka endik thin te, industry din kawnga dan tha taka zawm a tulziate hrethar turin kan chah a ni,’ MPCB chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy