- Zoramthanga
Khawpui sawn tum dan phung hi a pawm chi loh
- Zoramthanga
Chief minister Lalduhoma chuan Aizawl atangin Thenzawlah state capital sawn a tum niin MNF president Zoramthanga chuan a sawi a. Hei hi thil kalphung pangngai ni lo, pawm chi a ni lo tih a sawi.
Thawhtannia Mizo Hnam Run inkhawmah MNF president hian sawrkarin a ruka state capital Aizawl atanga sawn a tum dan chu thil kalhmang a ni loa, Mizoram Mohammad Bin Tughlag kan nei ta ni berin a lang tih a sawi.
Kumin April 21-a Ministry of Housing & Urban Affairs atanga Mizoram sawrkarin lehkha a dawn, “shifting of state capital from Aizawl to Thenzawl, Mizoram” tiin, detail project report siamna tur a ni a. Hei bakah hian sawrkar lehkha an hmuh theih hrang hrangah pawh Mizoram state capital sawnna tur thu hi a chuang niin a sawi.
Chief minister-in Aizawl khawpui tawt lutuk tih ziaawmna tura ‘peace city’ din tum a nih thu bak mipuiah puanzar a la nei loa, NGO leh political party hrang hrang bakah Zoram mipui pawh rawn an nih awm hriat a ni lo tih chief minister hlui Zoramthanga hian sawiin, “Hetiang thu liantham hi chu cabinet meeting thutlukna tal pawh awm tur nia a lan laiin, chutiang chu mipuiin kan hre lo. Chief minister thil tih dan hi thil nihphung pangngai ni lo, mipui tana pawmpui remchang lo a ni a, MNF tan pawh khawpui sawn tum dan kalphung hi pawm chi ni loin, a thalo kan ti takzet a ni,” a ti.
Mizoram state capital chu sawn dawn pawh ni se, Aizawl mipui tam zawk fein rem an tihpui loh tur a ni tih MNF hruaitu hian sawiin, rem an tihpui loh mai ni loa, sawrkar kalpui dan kalphung chu an nuih tiza tur a ni tih a sawi.
“Tun dinhmunah khawpui sawn chu thil harsa tak, sum leh pai tam tak luanralna tur leh mi tam tak nghawng tur a nih avangin, mahni duhthua thil kalpui ngawt chi a ni lo,” a ti.