Daily Newspaper

Khawpuiah khawpui sawrkar…

7

Khawpui thil kaihhnawiha rorel tur bik khawpui sawrkar ‘Aizawl Municipal Corporation’ a awm ve ta a. Khawpui sawrkar hian khawpui chhunga thuneihna a neih chin tur hi tun thleng hian a la chiang lo nge, khawpui kaihhnawih thila rorelna turah hian AMC thuchhuak hi a tam lo hle niin a lang.

Entirnan, khawpuia bazar lian deuh chhungah hi chuan Commerce & Industries deparment hian tun dinhmunah chuan hma a la deuh tlangpui niin a lang a. Hetih lai hian khawpui chhunga street vendor-te tana vending zone siam leh vendor te chungchanga hma latu chu AMC lam a ni a. Sawrkar laipui kaltlangin scheme hrang hrang hnuaiah AMC lamin street vending thilah hma an la a, vendor identified ten an thuthmun tur pawh luah hlei thei lovin an awm leh niin a lang.

Entirnan, veng pakhatah chuan AMC lamin vendor an identified fel vek tawh chu khawtlang thuneituten veng dang mi a nih avanga an veng chhunga inzawrh an phalsak loh an awm thin a. Hetah hian khawpui chhunga thuneitu AMC lam chuan harsatna an tawk ta thin a ni. Khawpui sawrkar AMC hian sawrkar laipui scheme hnuaiah dan angin hma lak an tum a, chutah chuan khawtlang hruaituten harsatna an lo siam hlauh thin tihna a ni. Khawpui sawrkar a din chhan hian awmzia a nei dawn lo tihna a ni.

Tuna Covid-19 hrileng avanga harsatna thleng mekah pawh hian, thlai man chungchangah kan buai mek a, chu chu khawpuia thleng a ni a, hmun dangah chuan a thleng ve vak lo niin a lang.

Chawhmeh man to chungchangah pawh hian, khawpui chhung kaihhnawih a nihnaah hian AMC hi hma latu tur niin a lang a, hetih lai hian AMC thuneihna lam chu hriattur a awm mumal leh chuang lo niin a lang bawk. AMC hian a thuneihna chhunga thil thlengah hian amah bilin hma a la lo a nih pawhin, a kaihhnawih department entirnan trade and commerce lam nen hian thawhhona ‘coordination’ hi an nei tur niin a lang a, tuna a lan danah hi chuan AMC lam hi a thuneihna huam chhungah hetiang lama inrawlhna emaw, tel vena emaw hi a nei lo niin a lang.

AMC hi khawpui sawrkar a nih angin, khawpui chhung kaihhnawih thil thlengah hi chuan a tam thei ang ber inrawlh thei se a duhawm hle a, chutianga a inrawlh theihna tur chuan sawrkar pawh hian thuneihna leh mawhphurhna hi pe tam thei se a duhawm hle. Khawpui sawrkar kan nei ve tawh a, khawpui kaihhnawih thil hi chu chingfel ve thei turin thuneihna leh mawhphurhna zau zawk hi pek ni se, sawrkar tan pawh a hahdamthlak zawk awm asin.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy