Rural Development & Administration department buatsaih “PAI 2.0 Report Card” chu Thawhlehni khan RD&AD minister Prof. Lalnilawma’n a tlangzarh
Minister chuan Local Administration Department hmalakna thar Panchayat Advancement Index (PAI) 2.0 indicator hrang hrang chu khawtlang hmasawnna atan an pawimawh hle dawn tih a sawi a. Village council chu khawtlang hmasawnna tura kaihruaitu pawimawh tak an nih angin, PAI kaltlanga data lakhawmtu mawhphurhna lian tak an nei tih a sawi a ni.
Mizoram hmun hrang hrangah theme 9 hnuaia ‘Grade D’ (beginner) awm miah loa kan awm thei chu chhuan tlak a ni, tiin, theme 5-na (Clean and Green Village) ah Kawrthah North VC-in sawrkar laipui atanga lawmman a dawng pha chu lawmawm a tih thu a sawi a. PAI 2.0 Report Card chu hmasawnna tura kan inenletna darthlalang pawimawh bera hmang turin sawrkar official leh khawtlang hruaitute a chah a ni.
LA,RD&AD director Dr Lalngura Tlau chuan Panchayat Advancement Index report a sawizau a. PAI 1.0 Report hi tlangzarh a lo ni tawh a, kuminah PAI 2.0 tlangzarh leh niin, nakumah chuan 2025- 2026 sawrkar kum behchhanin PAI 3.0 kalpui leh tur a ni tih a sawi.
PAI 1.0-ah indicator 516 leh data point 794 a awm laiin, PAI 2.0-ah chuan hna tihawlsamna atana zaa 71-a tihhniam a ni a; indicator 150 leh data point 230 chauh neih a nih tak avangin data lakkhawm a awlsam phah hle tih a sawi a ni. Data lakkhawm hi VC-ten an enfiah vek a ngaih avangin, PAI hmalakna hi VC-ah a innghat thui hle a, thudik leh langtlang taka data lakkhawm a pawimawh tih a sawi bawk.
PAI hi India rama Gram Panchayat-te hmasawnna leh khawtlang dinhmun ennawnna hmanrua, Ministry of Panchayati Raj-in a din a ni a. He hmanrua hi tualchhung hmasawnna (Localization of Sustainable Development Goals ) tihlawhtling turin nasa takin a pui tih sawi a ni.
Khawtlang dinhmun tehna atana hman PAI Report Card tichhuak
