Daily Newspaper

Khawtlang hna leh neitu rilru

10

Local administration department changtu minister Pu K.Lalrinliana chuan Kolasib khaw chhunga Village Council President 12 te kokhawmin khawtlang tana hmasawnna hna thawh chungchang a sawipui a. Khawtlang hmasawnna hna chu endikna kalpui a nih dawn vang chauha thawk tha ni lovin khawtlang tana thil tha tih duh vang zawka thawk thin turin a fuih a ni.

Tunhma deuh khan, khawtlang tana hmasawnna hnate kha sawrkarna chelhtu party-in an party mi leh sate induhsakna atan an leklam hle a. Khaw pakhata khawtlang hmasawnna hna, entirnan, step, retaining wall, culvert, zun in, community hall, tuiluankawr etc.. te chu a khawtual mi ni lo, khaw dang daih ami, ruling party mi leh saten an thawh thin avangin, hlep tam duh avangin ningnel taka thawh a ni fo thin. Chutiangah chuan hna thawh a nih laiin a nihna tur angin hna chu thawh a ni em tih mipui lam pawhin an enghelh lem lo a, hna a chhiat deuh pawhin, ‘a va thawk chhe e’ tih liam mai bak han bawhzui tumna a awm ngai meuh lo va. Hna thawh dan a lo dik lo deuh a nih pawhin, endiktu lamin thawh thattir leh aiin engtin tin emawa inremsiampui dan zawn lam an tuipui fo niin a lang bawk. Hnathawktuten neitu rilru an pu lova, a endiktute pawhin neitu rilru an pu lo a, mipui lam pawhin neitu rilru an pu pha bawk hek lo. Chutiang kalphung avang chuan, hmasawnna ruhrel dinin rei a daih ngai meuh lo thin. Tunah chuan mipui lamin thikthu tihchhiat nachang an hriat tak avangin, khawtlang hmasawnna hnathawhte pawhin belchian a lo dawl tain a lo daihrei ta zawk niin a lang.

Minister thusawi anga ‘thil tha tih duh vang zawka thawh’ hi VC level chauh loah pawh, ram pum huapin kalphunga neih a pawimawh hle tih a lang.

Kawngpui kan neih that theih lohna chhan pakhat hi, neitu rilru pu chunga kan thawh thin loh vang a nih hmel. Hetah hian, sawrkar emaw, department emaw, mipui lam emaw hi inpuhmawh thei chuang kan awm lo, neitu rilru kan put dan level hi a inchen tlang hle ang. Neitu rilru put kawngah hian kan muthlu tlang a ni deuh ber awm e.

Coronavirus pandemic hian kan dinhmun min rawn lepse sak a, chu chuan neitu rilru put kawngah hmasawnna a rawn thlen dawn niin a lang bawk. Tunhmaa midang rinchhana kan awm thinna kha, he pandemic hian a rawn chhu chat a, mahni kutkea din theih a pawimawhzia a rawn campaign a, ei bar thar chhuah kawngah sawrkar department an tho suau a, mipui lam pawhin sawrkar rinchhan ringawta awm a dik lohzia an hrechhuak thar a. Tawrhna nasa tak rawn thlentu ni mah se, he pandemic hi a lehlamah thatpuina tur tam tak kan nei dawn niin a lang a, ram leh hnam tana neitu rilru put kawngah hmasawnna a rawn thlen mek niin a lang.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy