Daily Newspaper

KHAWTLANG HRUAITU THLANCHHUAH THARTE HNENA THUCHAH

183

-Mahmuaka Chhakchhuak

Khawtlang aiawha hruaitu thlan tharte chibai ule.

A thente chu hruaitu ni reng sa in nih rualin a thente chu mi thar te pawh in ni ang. In dinhmun luah thar hi dinhmun sang tak leh pawimawh tak a ni a, khawtlang mipui chunga roreltu tur inni ngawt lo a khawtlang mipuite leh sorkar inkara palai hna thawk tu tur in nih zawkna hi keini mipuite chuan kan thlanchhuah chhan che u a ni. Khawtlangin hma alo sawn a, khawvel hmun danga hmasawn ruala hmalam kan pan ve theih zelna tura khawtlang dinhmun hrechiang tak chunga hma min hruai sak turin kan thlang chhuak che u a ni. In hnathawh dan a zirin kan fakin kan sawisel ngei dawn che u tih pawh in hriatsa a ni tho ang a, Pathian tihna nen fimkhur taka khawtlang tan rawngbawlna nei turin duhsakna hlan chungin kan han ngen hmasa a che u.

Internet khawvelah kan chen tawh avang hian khawvel letliama thil thleng leh an inrelbawl dan te hi mut hmun atangin duh hun hunah kan lo hmu ve vek thei tawh thin avangin leh kum lama naupang deuha kan ngaihte leh nu leh pa thlazar hnuaia tal mai mai rual ang leka kan ngaihte pawh hian khawvel hmasawnna hi nitina kan hmuh ve vek thin avangin hmasawnna rahbi rap ve turin kan khawtlang hi kan duh theuh a. Mizo thinlungah chuan rualawt reng rengin kan awm a ni ber a, thenawmte’n Fridge an neihin neih ve ngei kan tum a, TV an neihin neih ve kher kan tum bawk zel thin avang hian duhamnain chintawk a awm lo tihna a ni ber. Hetiang reng renga kan nun vang hian sorkar leh mipui inkara palai hna thawktu nangni chungah phei chuan beisei a sang awl bik em em a ni. Khawtlang huapa inhlawhna emaw thil dawn tur emaw a awm te hian mahni tanghma hai taka midang nek chi vek kan ni bawk si a, rualkhai taka rorelna nei thei hram hram turin kan duh che u a ni. BPL emaw AAY pawh nisela sorkar laipui atanga kaihhruaina awmsa vek hmangin kan khawtlangah a dawng thei tur chi thlang ula, duhsak bik, entirna atan mahni party mi leh sa chauh te emaw thlang bik loin rualkhai taka thlan tum thin turin kan ngen leh duh a che u.

A chang phei chuan rorel thiam har khawpin mipui nek buaina in tawng ngei bawk ang, lu ti hai tak tak thil pawh in tawng bawk thin ang. Chutiang hun pawh lo thleng mahsela in ring ti khawng tlat ang che u. Lal Isua ngei pawh khan a hnungzui tu (zirtirte) atana mi 12 lek a thlanah pawh khan amah man tir tu an awm tho ang khan mitin lawmna in thlen vek thei kher lo ang. Nangmahniah rinawmna leh dikna nei tlat ula hmangaihna nunpui bawk ula, heng thil pathumte hi a pawimawh em em a ni. Nimahsela Rinawmna te Dikna te leh hmangaihna te in neih loh erawh chuan sawiselna in tawng ngei ang a, thenkhatte phei chuan in diklohna hailan tumin court hial te pawh an kal duh maithei bawk. Thenkhatte phei chuan chanchinbu hmang tein emaw in diklohna an puangzar duh ngei bawk ang a, in nupui fanaute tana zahthlak takin thil ti duh an awm maithei bawk a ni. Chuvangin Rinawmna leh Dikna hi nei hram hram ang che u. Khawtlang tana thawk in nih ang ngeia khawtlang in hmangaihna hi mitin hriat nisela sawiseltu awm mahse in hnathawh chu nakinah fakin a la awm tho ang.

Tun laiin mi thenkhatte chu khawtlang roreltu an han nih atang hian an mizia a danglam tain hotu emaw an inti mai thin. A thente phei chuan an lakluh phu loin In tha tak tak te an sak phahin lirthei changkang tak tak an neih phah thin bawk a ni awm e. Hengte hi ti ve reng reng lo turin kan ngen duh che u. Khawtlang mipui tana rawngbawltu in nihna hi hrereng ula, kuttling loa sum leh pai lakluh hi ching ve lo turin kan han ngen duh che u a ni. Hetiang tih chinga In ropui leh lirthei changkang tak tak nei te hi an awh-awm reng reng loh a, an ni leh keini chunga rorel tu Pathian hian kan phu tawka malsawmna min pek theuh hi lawm taka pawm tur zawk tur a ni tih bakah hetianga kut tling loa sum la lut thinte hi mi chhuanawm tak tak an vang viau a ni tih te hi hrereng ula kan duh a ni. Nangni hi kan khawtlang hmel ti mawi tu leh khawtlang mualpho phah theihna tura kan hmatheh te in nih vang hian in chungah pawh kan thikthu a chhiain in lakah ngei pawh hian kan pangchang bawk tih hi min hriat reng sak ula, kan nu leh pa in ni a, khawtlang tan theihtawp chhuah turin kan duh che u a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy