Khawvel buaina karah ralthuam siamtute hlep a pung
Khawvela ralthuam siamtu lian zual 100-te ralthuam leh sipai hmanrua an hralh chhuah atanga an hlep chu kum 2024 khan $ tlklehdingawn 679 niin a hma kum atangin a pung nasa hle niin Stockholm International Peace Research Institute (SIPRI)-in chhinchhiahna a tihchhuahah tar lan a ni.
Gaza leh Ukraine indona bakah khawvel hmun hrang hranga inepna boruak sang tak awm karah sipai hmanraw siamtute an inhralh nasa hle a, Thawhtannia report an tihchhuahah a hma kum aiin an hlep hi 5.9%-in a tam zawk.
Europe leh United States-a company-te an inhralh tam zual a, Asia leh Oceania tih loh khawmualpui hrang hranga mite pawh an inhralh tha vek tho.
Lockheed Martin, Northrop Grumman leh General Dynamics chu US-a inhralh tam ber niin kum 2024-a inhralh tha zual 100 zingah US company 39 an lang a, heng zinga 30 phei chu a hma kum aiin hlep an ngah zawk vek.
Hlep a that mek rual hian SIPRI chuan project lian tak tak zingah, F-35 indo thlawhna, Columbia leh Virginia-class tuihnuailawng leh Sentinel intercontinental ballistic missile ang chia sum inpek muan leh siam chhuah muanin hlep tam thei zawk tur ang a timuang zawk nia sawi a ni.
Russia tel lovin Europe-a ralthuam siamtu 26 chu hlep tha zual 100 zingah an tel a. Heng zinga 23 hian an hlep that ber kum an tawng hial a, chawhrualin a hma kum aiin 13% laiin an hlep tam.
Czech company Czechoslovak Group chuan kum 2024 chhung khan a hma kum aiin 193% zetin hlep an ngah zawk a, he hi an thenawm, Ukraine-in laipuimu an leisak nasat vang a ni a, kum 2024 chhunga company mala hlep pung nasa ber an ni hial a ni.
Ukraine hian Russian-te beihna a tawk reng a, an rama JSC Ukrainian Defense Industry pawhin hlep pungin a hma kum aiin 41% zetin an hlep tam zawk.
Rostec leh United Shipbuilding Corporation chu Russian arms company zingah hlep tha zual 100 zinga lang awm chhun an ni a. An pahniha an hlep hi a hma kum aiin 23%-in a tam a, khawthlang ramten Ukraine indo avangin hrek mah se an inhralh tha hle tho a ni.
Asia leh Oceania-a ralthuam siamtuten kum 2024 chhungin $ tluklehdingawn 130 hlep phak mah se a hma kuma an hlep zat a pha lo va, 1.2%-in an hlep tlem zawk a ni.
Asia-ah hian Chinese ralthuam siamtu company lian zualte hlep tlemin a nghawng a, anni hi nikum aiin chawhrualin 31% velin an inhralh chhe zawk a ni.
Japanese leh South Korean ralthuam siamtute erawh an inhralh tha tho va. European bakah tual chhungah an inhralh nasa a, hei hi Taiwan leh North Korea-a buaina neuh neuh awm vang a ni pakhat.
Khawvel buaina karah ralthuam siamtute hlep a pung
