Daily Newspaper

Khawvel huap Science Expo-ah Mizo pahnih tel

11

International Science Fair, Expo Mexico 2020 neih mekah India ram aiawhin Mizo zirlai pahnih – R.Lalnuntluangi leh Lalhruaitluanga, St Paul’s HSS-a class XII zirlaite an tel a. December 8 tlai dar 5 khan Expo-ah hian an project siamte online-a present in, zawhna leh chhanna hun an hmang nghal a ni.

R. Lalnuntluangi hian a project-ah Areca Husk (kuhva kawr) atanga paper siamchhuah dan a hmang a. Kuhva kawra cellulose leh a kawr hnip lai lakkhawm atanga paper siam dan a entir a, India kuhva leh Myanmar kuhva kawrte lakhawmin a khaikhin bawk a ni.

Lalhruaitluanga hian thingpuifea antioxidant awm dan project-ah hmangin green tea chu antioxidant awm tamna a nih dan te, Mizo thingpuife – Ziksen leh Darzo te chu a that dan leh tih lar zel tlak a nih dante a pholang ve thung a ni.

Mizo zirlai pahnihte hi Science Teachers Association Mizoram (STAM) in a tirhchhuah te an ni a. STAM hian Samagra Shiksha nen tangdunin Mizoramah Children Science Congress an buatsaih a, district level-a intihsiak hnuah state level intihsiak neih a ni a, heta zirlai titha thlanchhuahte chu National Children Science Congress-ah Mizoram aiawha tirh an ni a. National-ah hian state leh UT atanga zirlai thiam thlan chhuahte an inel leh a, zirlaiten an project siam leh sawifiahna atangin Mizo zirlai pahnihte hi India aiawh tura thlan an ni ta a ni.

Heng zirlai thlan chhuahte hi Foundation for Global Science Initiative (FGSI) scientist-ten an duh duh zawtin interview an neihpui a, chumi hnuah Expo Mexico 2020-ah hian India aiawh tura tih an ni ta a ni.

Zirlai pahnihte guide teacher hi Vanneihsangi Tochhawng, St Paul’s HSS-a zirtirtu a ni a. Expo Mexico 2020 neih mek hi December 12 thleng awh tur a ni a, a buatsaihtute hmaah vawikhat presentation neih leh an la hmabak a ni.

School Education minister Lalchhandama Ralte chuan Mizo zirlai pahnihten India ram zau tak leh mihring tluklehdingawn khat chuang aiawha International Science Fair-a project an phochhuak thei chu lawmawm a tih thu leh chhuanawm a tih thu a sawi a. An kalzelna turah Mizoram tan mai ni lo India ram tan chhuanawm taka ke pen zel turin duhsakna a hlan tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy