India sawrkar chuan khualzin hipna kawngah khawvel huapa lang tham tur khawp siam lamah hma lak a tum a, chutah chuan Mizoram a tel ve theih dan dappui turin Tourism minister Lalnghinglova Hmar chuan Union Tourism hotute a ngen.
New Delhi-a cham mek Tourism minister hian Nilaini khan Ministry of Tourism secretary Bhuvnesh Kumar IAS a kawm a. Mizorama tourism project kalpui mek leh project hmachhawp hrang hrang an sawidun.
Tourism hmasawnnaa Mizoram sawrkar hmalaknaah Ministry of Tourism puihna leh duhsakna lawmawm a tih thu a sawi a. Ram chhung leh pawn atanga tlawhtu pung zelah Mizoramin khualzin thahnem zawk a hip theihna tura theihna a neih tihpuitlin zel a duh dan a sawi.
Mizoram atanga Ministry of Tourism scheme hrang hranga project thehluh thlirho a ni a. Union Tourism secretary chuan, an ministry kalphung a inthlak chho mek tih sawiin, hmun tam takah project tereuh te te siam loin, state pakhatah project liantham pahnih khat kalpui a, khawvel huapa lang tham ‘destination’ siam tum a ni tiha sawi. Hemi atan hian scheme awm sa pawh belhkhawma scheme thar duan a ni a, tun atanga reiloteah approval hmuh hman beisei a ni, tiin, scheme thar kalphung tlangpui sawiho a ni.
Mizorama tourism hmasawnnaah khawtlang nen tangruala hmalakna ‘community -based tourism’ leh tourism entrepreneur-te an pawimawh hle tih Lalnghinglova Hmar hian sawiin, Tourism ministry scheme tharah pawh component pakhat anga telh theih nise, tiin rawtna a thlen a. Tourism secretary hian sawrkar laipui pawhin hei hi a ngaihpawimawh a, scheme tharah telh tum a ni tih a sawi.
Union Tourism secretary hi addl. secretary Suman Billa chuan a tawiawm a ni.
Khawvel huapa khualzin hipna liantham siamnaa telh ve ngen
