World Health Organization chuan WHO lader special meeting an neihnaah khawvel mihring 10 zinga pakhat zelin Covid-19 kai thei an nih thu a sawi.
WHO top official chuan ‘khawvel mipui tam zawk chu Covid-19 kai thei dinhmunah an la ding a ni’ tiin a sawi bawk a.
Coronavirus kai khawvelah maktaduai 35 chuang an awm tawh a, hei hi tihchian chin niin WHO chuan maktaduai 800 velin kai turah a chhut thung.
Mithiamte chuan confirm case aia tam zawk daih Covid-19 kai an awm an rin thu an lo sawi fo tawh a ni.
WHO chuan Geneva, Switzerland ah khawvelin pandemic a beihlet dan turah sawikhawmna an nei fo va.
Thla 10 a ral hnuah pawh pandemic chuan tawp lam a la pan hauh si lo. Ram tam takah virus leng thawh hniha a thleng mek a, ram thenkhatah chuan thawhkhatna aiin kai an tam zawk bawk.
Khawvel mipui 10% velin virus an kai tawh anga ngaihna hi Mike Ryan, executive director of the WHO’s Health Emergencies Programme chhut dan a ni a.
“Hei hi ram azirin a danglam thei ang, thingtlang leh khawpuiah pawh a dang lam thei ang a, group hrang hrangah pawh a dang lam thei ang,” a ti thung a.
“Mahse, thil chiang tak chu khawvel mipui tam zawk te hi virus kai thei dinhmunah an la ding a ni. Pandemic chu a la leng reng dawn tih kan hria a, mahse, inkaichhawn nasat a awm loha nunna chhanhim a nih theih nan hmanrua kan nei tih pawh kan hria a ni,” tiin a sawi bawk.
WHO Director General Tedros Adhanom Ghebreyesus chuan khawvel hmun tinah Covid-19 kai dinhmun a inan loh nasat thu a sawi a. “Ram tin a khawih vek chungin he pandemic hi a rual lo khawp mai a. Ram 10 in nunna chan 70% an nei a, a kai zawng zawng zahve chu ram pathum mite an ni bawk,” tiin a sawi.
Johns Hopkins University te chuan virus avangin mi maktaduai chuangin nunna an chan phah tawh a. United States tihlohah India leh Brazil ah virus kai an tam ber tawh a ni.
(THE AIZAWL POST – Rampawn)
Full>> ePaper Subscribe
