Daily Newspaper

Khawvel pumah Covid-19 kai pung zel

13

Spain chuan coronavirus kai an pung leh tak hluai avangin ‘second wave’ a thlen hlauhna avangin khuahkhirhna thar an kalpui leh ta.

Kar hnih kalta khan Catalonia chuan nightlife kaihhnawih hrim hrim a lo khap tawh a, hetihlai hian khawpui pawn hmarchhak lamah Covid-19 kai thar an pung bawk.

UK chuan Spain atanga an mi leh sa haw te chu an inkhung hrang vek tur a ni tiin thupek a chhuah bawk a. Norway leh France te pawhin fimkhur tura thupek an chhuah zui bawk.

France leh Germany ah pawh economy hawn tuma hmalakna kalpui mek laiin kaithar an pung leh bawk a.

European rama virus kai thar hi khawvel hmun dang nen a kal thiang hle a, tun hnai ni hnih chhungin khawvel pumah virus kai thar ni khat thil thuah 280,000 an chuang ve ve bawk.

“Eng ram mah a khawih loh a awm tawh lo va, tuna a pun hluaina chhan hi chu America leh South Asia-ah nasa taka inkaichhawn a awm tak vang a ni” tiin World Health Organization (WHO) chuan thuchhuah siamin a tarlang.

Khawvel pumah Covid-10 kai maktaduai 15.7 an awm tawh a, nunna chan pawh 640,000 an awm tawh niin John Hopkins University te chuan an sawi.

Spain-ah eng nge thleng?
Spain-in state of emergency a puan atanga thla khat a liam chauh tihah Barcelona, Zaragoza leh khawpui ber Madrid-ahte chuan Covid-19 kai an pung leh thur thur a, hei vang hian sorkar chuan second wave a thlen an hlau hle a ni.

Catalonia sorkar chuan nightclub leh night-bar-te chu karhnih chhung khar turin thupek a chhuah zui nghal a. Spanish defence ministry pawhin response tracker system chak takin an kalpui bawk.

Kar kalta Zirtawpni khan health ministry chuan virus kai thar 900 hmuhchhuah an nih thu sawiin, chung zingah chuan second division football team Fuenlabrada a player 28 lai an tel a ni.

Spain a inkai-chhawnah hian thalai an tam ber a, hei hian hlauhthawnna nasa zawk siamin zan lamah te pungkhawma chet la ber ber an nih bawk si vang a ni a. |halai ten kaiin an chhungte kum upa zawk an kai nasa zel dawna ngaih a ni.

Europe ram dangah?
Europe ram tam berah Covid-19 kai an pung a, mahse ram tam tak chuan an economy a pangngai thei ang bera a kal theih nan chet an la zui tho va. Belgium chuan virus kai thar a ngah hle chungin a economy a hawng lui tho thung.

Italy chuan ram dang atanga lakluh inkai chhawn a tam avangin Romania leh Bulgaria atanga an ram lutte chu karhnih chhung kharkhip tur a ti zui bawk.

French Prime Minister Jean Castex chuan virus leng tamna ram 16 atanga France lut te chu on-the-spot coronavirus test neih vek tur a ti.

France health ministry chuan nitin virus kai thar 1,000 chuang hmuhchhuah ziah a nih leh tawh thu a sawi bawk.

Germany pawhin Covid-19 len tamna hmun atanga haw te chu test ti vek turin a ti bawk.

Khawvel pumah?
Pandemic leng chu a la nasa tial tial niin WHO chuan a sawi a, kar kalta tawp lam ni thum chhung khan inkaichhawn a nasa zual tiin a sawi bawk.

Tuna ngaihven hlawh ber chu India niin virus kai maktaduai 1.3 an awm tawh a, tun hnai ni hnih chhungin kai thar 100,000 hmuhchhuah an ni bawk a, mithiam te chuan India bikah hian a la nasa tial tial dawn an ti bawk.

Virus kai thar langsar zingah Madhya Pradesh Chief Minister Shivraj Singh Chouhan pawh telin, mipuite chu fimkhur turin a chah mawlh mawlh a.

United States, Brazil leh South Africa-ah pawh inkaichhawn nasa takin a la awm reng bawk.

Hetihlai hian Brazilian President Jair Bolsonaro chuan virus a kai hnu kar hnih hnuah a negative tak thu a sawi a, a dam that chhanah hydroxy-chloroquine chu a fak thung. He tih mek lai hian kum tina maktaduai tel fuan-khawmna Rio deJaneiro a New Year’s Eve celebration chu thulh tur a nih thu puan chian a ni zui bawk.

Vietnam-ah pawh tualchhunga inkai-chhawnna finfiah thla thum hnuah Danang khawpuiah kum 57 miin a kai leh avangin inralring takin an awm leh bawk a.
WHO chuan pandemic intan hnu atangin Africa bikah health worker 10,000 ten an kai tawh niin a sawi bawk a. Hong Kong pawhin nikhat thila virus kai an hmuh tam ber tawngin Inrinni khan mi 130 kaithar hmuh a ni bawk.

Ramdang atanga inkaichhawn pung zel vangin South Korea-ah pawh March thla hnua virus kai hmuhchhuah tam ber an thleng leh a, Japan-ah pawh virus kai pungin kar kalta khan karkhat chhunga virus kai hmuhchhuah tam ber an tawng zui bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy