October ni 17 khan rapper Eminem chuan kum 51 a tling ve ta a, a pianchampha hi pel deuh tawh mah se a puala kam hnih khat han thailan ve hi chu a phu chiang a ni. Eminem hian Guinness World Record a siam nual tawh a, chung zingah chuan khawvela thu chham rang ber record pawh a tel a, second khatah thumal 7.5 a chham hman!
A hla hit ‘Godzilla’-ah khan a chang thumnaah second 30 chhungin thumal 225 a chham a, chu chu second khatah thumal 7.5 chham hman ang a ni a, hei hi Guinness World Records chuan khawvela rap rang berah a puang a ni. He record hi khum tumin rapper tam takin an bei tawh a, mahse, vawiin thlengin Guinness chuan hei hi record-ah a la puang ta reng a ni.
A hla hit dang ‘Rap God’-ah pawh khan Eminem hian minute 6 leh second 4 chhungin thumal 1,560 a chham hman a, chu chu second khatah thumal 4.28 zel chham hman ang a ni bawk. Hei pawh hi chham rang zeih zeih tak chu a ni tho mai.
He American rapper hi Detroit, Michigan-a khawi lai hmun kilkhawr deuh emaw rap battle vela bul tan ve mai kha a ni a, mahse, hip hop khawvela huhang nei lian ber te zinga mi a ni ta a ni. 1997 khan Rap Olympics, Los Angeles-ah telin freestyle category-ah pahnihna a ni a, heta tang hian Dr. Dre mit a la ta riau a, ani hian a hnuaiah la lutin, a producer leh mentor a ni zui ta a ni.
1999-ah Eminem hian The SLim Shady LP a tichhuak a, a bak chu sawi a ngai tawh lo, rimawi khawvelin Eminem hming hi a theihnghilh tawh lo ang. He album avang hian Grammy Award pahnih dawngin, MTV VMA pali a dawng nghal nghe nghe a ni.
Khawvela \awng rang ber!
