Khawvela innei rei ber record siam
Kum 60 innei te hian Diamond Jubilee an lawm thin a, chutiang chu mi nazawng thlen phak loh a ni a, lawm pawh a phu viau. Mahse, Diamond Jubilee lawm zawh hnu lawkah nupa an inkalsan duh an ti! Brazilian nupa, Manoel Angelim Dino leh Maria de Sousa Dino te chuan Diamond Jubilee mai ni lo, Platinum jubilee pawh ni lo, Oak jubilee an lawm tawh. Oak jubilee chu kum 80 anniversary sawina a ni a, Dino nupa hi kum 84 an innei tawh a, Guinness World Records chuan khawvela nupa innei rei berah an puang.
Manoel hi kum 105 a ni tawh a, a nupui Maria pawh kum 101 mi a ni tawh a, February ni 14, 2025 khan kum 84 leh ni 77 an innei tling tawh a, nupa damlai zinga innei rei ber record-ah GWR-in a puang.
Dino nupa hi 1940 khan Boa Ventura, Ceara, Brazil-ah an innei a, Manoel hi 1919 a piang niin, Maria hi 1923 a piang a ni ve thung. 1936-ah an chhungte huana an hnathawhna atanga inhmelhriat tan a, an inngaihzawn tak erawh a hnu deuhah a ni thung.
An intawn tirh hian Maria nuin an inzui chu a lawm tehchiam lo a, Manoel hian Maria nu rilru hneh turin bei ngial a, an inpawh thei ta chauh niin an sawi a, an chhungte phalna ngeiin 1940-ah an inkutsuih ta a ni. An nupa hian fa 13 an nei a, tu 55 leh tuchhuan 66 an nei tawh.
Manoel leh Maria te hi chhinchhiah theih china nupa innei rei ber chu an ni lo a, tuna damlai zinga innei rei ber an ni. GWR-in innei rei bera a chhinchhiah te chu David Jacob Hiller (20 Oct 1789 – 7 July 1899) leh Sarah Davy Hiller (17 March 1792 – 8 April 1898) te niin, Sarah boral hmain kum 88 leh ni 349 an innei hman a ni.
Khawvela innei rei ber record siam
