Daily Newspaper

Khawvela motor tlan theihna lei verh sei ber hawn turin an peih ta

7

Motor tlan theihna lei verh thui ber ni tura an sawi Atal Tunnel, Rohtang ami chu hawn theih turin an peih ta. He tunnel hi meter 3,000 a sang a awm a ni a, km 9.02 a sei a ni. Ladakh velah India leh China inngur deuh chher cher lai a lo ni bawk nen, he lei verh hi India tan ram venhimna atan a pawimawhin a tangkai dawn hle a ni.

Atal Tunnel hi cheng vaibelchhe 4,083 senna tura ruahman a ni a, mahse, cheng vaibelchhe 3,200-in an zo thei a, Prime Minister Narendra Modi-a’n a hawng dawn a ni. He lei verh hi Prime Minister hlui Atal Bihari Vajpayee hming chawi tir a ni.

Atal Tunnel hi Leh-Manali highway a Pir Panjal range chhak lam Rohtang Pass a lei verh kawng niin, km 9.02 a sei a ni a, Manali, Himachal Pradesh leh Leh, Ladakh inkar chu km 46-in a ti tawi dawn a, darkar li vel motor-a tlan nana hun sen tur a paih dawn niin an sawi.

He lei verh kawng hi Border Roads Organisation (BRO) siam niin, Project chief engineer K P Purushothman chuan lei verh chhunga electrical leh mechanical hna thawh zawh fel tawh niin a sawi a, “He tunnel hi cheng vaibelchhe 3,200 a kan zo thei hi kan lawm hle a ni. He tunnel hi Himalaya tlang dunga engineering hna ropui tak a ni, hetianga hmun sangah chuan khawvela lei verh motor kal theihna sei ber a ni,” a ti.

He lei verhah hian meter 60 danah fire hydrant dah zel a ni a, meter 500 danah rikrum thil a tlan chhuahna siam vek a ni a, km 1 danah boruak awmdan tehna dah vek niin, emergency telephone booth pawh a khat mawi tawka dah niin, boradcasting system leh automatic incident detection system changtlung tak awmin, metre 250 danah CCTV camera dah vek a ni bawk.

He lei verh chhungah hian mobile network pawh a tha hle a, tunnel thenkhat a mobile service a tawp thin ang a awm ve dawn lo va, 4G network pawh tha takin a man tluan chhuak parh dawn a ni.

He lei verh hi metre 10.5 a zau niin, metre 5.52 a sang a ni a, a sir tawn tawnah ke a kalna metre khat a zau a bawk. Lei verh chhungah hian maximum speed chu 80 kmph a ni a, an hawn hunah chuan nitin car 3,000 leh truck 1,500 vel tlan tura chhut a ni.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy