Daily Newspaper

KHAWVELA RAM SA HLAUHAWM BER!

6

Dr J.T.Vanlalngheta

Nani Palkhivala thu ziah ‘The Ailing Planet’- ka chhiar atangin thil dangah ngaihtuahna a kal a, a then azar chu hetiang hi a ni:

Kan thupui hi ‘khawvela ram sa hlauhawm ber,’ tih a ni a; khawvela ram sa hlauhawm ber chu Lusaka a ni em? Ni lo ve. Lusaka chu Zambia khawpui a ni daih!

Zambia khawpui Lusaka-ah khuan sahuan a awm a, chu sahuanah chuan ram sa khungna bâwm (cage) a awm a, chu bâwm pâwn lamah chuan, ‘khawvela ram sa hlauhawm ber,’ tih hi a intar a, chu bâwma thil inziak hmu apiang chuan a chhung en an chak êm êm vek mai a; mahse, a chhûng an han en meuh chuan an tum loh takin ram sa hmuh ahnêkin, mahni leh mahni chiang taka inhmuh theihna darthlalang (mirror)-a mahni thla zâwk an han hmu ta thut mai thin chu mak an ti hle thin a ni awm e.

A nih, chu darthlalang (mirror), mihringin an en apianga lo lang chu ram sa hlauhawm ber a ni thei dawn em ni, a aia hlauhawm chu Sakei te, sai kawlh te, samak te, savawm te, tuipuia shark te, rul chuk na mi, rûlngân ang te leh adt a ni dawn lo’m ni le, tiin zawhna kan nei a ni maithei. A chunga zawhna khi chhan dan a inang lo nual ta ve ang.

Aw le, mihring tana sa hlauhawm ber chu– thihna emaw, na taka dam lohna emaw inhliamna emaw, retheihna nasa tak emaw, innghaisakna emaw, chawp leh chilha thihna, tuarna leh hrehawmna nasa tak thlen thei ni kher lo mah se, mihring hriselna atana tha lo leh hlauhawm tak, hun rei hnua nasa taka tuarna leh thihna thlen theitu hi a ni ber ang chu; chu chuan kawh bîk chu a nei a ni! Khi’ng ka’n sawi ram sate khi silai emaw ralthuam dangte emaw tel lovin mihring hian bei ta ngawt ila, an hlauhawm thei viau ang a, thihna thlen thei ram sa hlauhawm ber berte zinga mi chu an ni ngei ang. Nimahsela, tunlai khawvel mihring finna leh thiamna thûk tawhzia leh nun phung sân nasat tawhzia leh technology changkang tak tak mihringin a hman thiam hnuah hi chuan ram sa eng mah hi hlauhawmah ngaih ni tawh lovin, mihringte thian, mihring nun ti nuamtu leh ti hlimtu, mihringte hriselna leh dam rei nana pawimawh te an ni tawh zawk a ni tih hi ‘thu mak ka sawi nin theih loh chu,’ tih hla anga sawi nin theih loh a lo ni ta. Chubakah, anmahni humhalh hi mihringin a tih ngei tura Pathian ruat a ni tlat zawk a ni tih hi kan lo hre tawh a ni.

He lei hi mihring taksa anga chanin ram ngaw te, ram sa leh nungcha tinreng te, thlawhbua hrim hrim te, lui leh luia cheng nungcha te hi mihring taksaa mit, ruh, thâwkna dâwt, pumpui, ril, chuap leh taksa bung hrang dangah te han ngai ta ila, kan chenna lei leh a chhunga awmte hi chu duat taka enkawl nachang kan hre ngei ang. Hmasawnna (socio-eco-cultural development) hi duh anga a la thlen pumpuhlum theih loh avangin kum tin thing leh maute kan ti chereu a; ram ngawte thiatin lo, adt atan kan vâtin kan rawh vak vak mai a, chu chuan nungcha leh ram sa leh tui hna te a ti tlem tial tial a, tun ang zela kan chheh vel thilte kan nghaisa a nih chuan (India President fam ta Pu Kalama sawi lâwk dung thûlin), kum 50 hnuah chuan tui hna hi a tlem tawh lutuk anga, lu sûkna atan pawh tui kan hman phal tawh mang dawn loh avangin, lu kawlh chu kan intih hmuhin kan incheina a ni tawh ang. Tin, mihringin nunna atana a hîp luh oxygen pe chhuaktu ber leh ruahtui hîptu ber ram ngawte a awm mang tawh loh avangin, a chhunga cheng ramsa, sava leh nungcha dangte pawh an thi zo deuhthaw tawh a, lei chu thlalerah a lo chang deuh vek tawh a, mihring tan pawh dam khaw chhuah harsa khawpin thil nung inchhawr tawnna (ecological system) chu tih chhiat a lo ni ta a, nuam taka nun khawchhuah zel chu ngaihtuah ngam chi pawh a ni ta lo a ni. Hetianga chhut hian keimah ngei, keimahni mihring ngei chu mahni tana ram sa hlauhawm ber kan lo ni ta a ni. Chuvangin, loh theih loh a nih loh chuan keimahni phak tâwkah thing leh maute hi sat mai mai lo ila; mahni leh mahni emaw mi dangte emaw hriselna ti chhetu, tûra sangha hraitute hi danin a phût angin dîm lo ngam bawk ila. Sava sa te, rama cheng sa te ei lo hian kan awm thei tawh bawk a, anmahni thah chu The Wild Life Protection Act, 1972 leh Relevant Act & Rules dangin a sawi anga pawisa tam tham tak leh kum eng emaw zat lung in tan theihna thlenga inhrem theih a nih piah lamah mihring nena kan lo hrisel tawn nana thawk ho tur kan ni tih hriain nungchate hi khawngaihna, hmangaihna leh duatna mita enin i humhalh zel ang u. Thing leh mau te, sava te, ramsa, lui, dil leh tuia cheng sate tana khawvela sa hlauhawm ber nih reng mai chu mihring danin a phal lo mai ni lovin Pathian pawhin a phal lo a ni tih hi i hre tel bawk ang u. Pathianin mihringte hi mak tak leh ropui taka ama anpuia a siam kan ni a, chuvangin duh taka a siam leh mawi a tih em em ve tho râwng taka kan han that thin hi chu, a ti hlumtuate ngei pawh hi he leiah hian tluang hle tur chu kan ni bik lo maithei tih hi a rin theih a ni; Bible zirtirna ‘Biblical theology on eco-system, ecological balance and sustainable development’ tih te chauh pawh hi han zir ngun ve deuh ila kan hre mai ang chu.

Kum 2019 kum tawp lam atanga he lei (khawvel) dâp/huapa hripui lêng mek ‘conora virus’ chu a lo chhuah kum denchhenin WHO-in Covid-19 hming a pe a, Mizoramah pawh 2020 kumtir lam atangin kan lo hmelhriat ve tana, kum 2020 kum tir lama hri kai mi pakhat chauh kan awm a, thihpui phei chu kan la awm lo a ni; he thu ziah lai (July 19, 2021) hian mihring hri kai 27,489 lai kan lo awm tawhin thi pawh 124 zet kan lo awm ta bawk a, a pawi ngawt mai; hri inkai darh hi a awlsam tâk êm avâng hian a thawh hnihna (second wave), Delta variant ti-a an sawi bawk chu a lo thleng tawh mai ni lovin he Covid 19 chi dang tho alpha leh eta pawh hi lo thleng der tawha ngaih a ni tih mi thiamte chuan an sawi (Vide a Report by Dr Pachuau Malsawma, State Nodal Officer & Spokesperson on Covid 19, H & FW Dept., written by MIS, Dt 21.7.2021 @ 3:57 PM). ‘Delta’ hi Greek hawrawp ‘alpha, beta, gamma, delta, epsilon, zeta, eta… atanga lâk a niin, Covid 19 hripui tho, a chi dang deuh (variant) sawi nana hman a ni a, WHO sak bawk a ni. Khawvela hripui la awm ngai lo, a tir atanga tun thleng hian he hripui hi khawvela scientist thiam ber berte pawhin an hriat vawi khatna leh a nihna tak tak hi za-a za (100%) hriat theih a la nih loh avangin an hriat tirh phata ‘hripui thar’ (Novel corona virus) tia a hming an lo sak nen hian a la inhmeh zui viau zel a ni. A do nan leh inven nan vaccine te an han hmu chhuak ta a, a lâwmawm hle rualin vaccine la tawhte pawh la kai theih tho a nih avangin la fimkhur zui êm êm tûr a ni a, tâwngpâwng zuam ngawt emaw inthlahdah taka nun phahna tur emaw a ni chuang reng reng lo. Inchiu tawhte chuan hri an kai pawhin an na lutuk lo deuh vang tih mai a ni.

Aizawl Civil Hospital-ah hian (an ti alawm) pa pakhatin hmai tuamna khabea dah thla chungin (facemask vuah lovin, ti mai ila) khuma damlo mu reng chu a tawngtai a, a tawngtai zawhah chuan a piah lawka daktawr pakhat chuan, “Ka pu chu, hmai kawr (face mask) vuah chungin i tawngtai lo va, a tha lo êm mai â,” tia a hrilh chu, “Ka vuah reng alawm,” tih pahin a hmui/kâ leh a hnâr tuam phâk tur chuan rang takin a khabea mask chu a pawt chho nghal a. Chupa hriat phâk lohah chuan Doctor pakhat zawk chuan, “Chawp leh chilha dâwt a sawi avangin kha pa tawngtaina khan a thlen thui vak a rinawm lo,” tiin fiamthu ti takin, a bula thu daktawr hriat tham lek chuan a lo sawi bawk a ni awm e. Nia, Kha pa kha kan sawi zuina ni chuang lovin, Pathianin kan tawngtaite hi chhâng se kan tih chuan, a chibai bûktuten thlarau leh tih tak zetin chibai an (kan) bûk tur a ni (John 4:24b); chuvangin, keimahni pawh thlarau leh tih tak zet (thu tak)-a kan tawngtai a ngai a ni. Thlarauva awm a, thinlung inhawng chung leh dawt sawi lova a hnena kan inlan a ngai a nih chu.

Tawng thu chhe lovah, Kristian kan nih vang ngawtin he hripui lakah hian kan him lo tih chu he hripui kài avanga khawvel ram hrang hranga kristiante thih tam tawhzia, a figure nena ti lang lo pawhin kan hre vek tawh a, Mizoram leh Zoram pawna kan rawng bâwltu tha Reverend te, Missionary te leh Pathian rawng bawltu dang eng emaw zât he hripui vanga an thih tam tawhzia pawh inhrilh nawn a ngai âwm lo ve. Tin, tar leh natna bik nei atanga natna nei sâ ni lo leh naupang lam thlenga he hripuiin min zuah lohzia pawh a hretu vek kan ni tawh. A pawimawh ber chu thu neitu tling (DM&R Dept& SEA, etc) ten Covid laka kan him theih nana kan awm dan tura a tul anga an duan Covid Awm Dân Mawi—Covid Appropriate Behaviour (CAB) zâwm ngei ngei hi a ni; zâwm lo an awm pawhin kan thiante, chhungkhat hnai leh hmelhriatte an nih pawhin, VLTF, LLTF emaw (State) Executive Duty member emaw kan nih loh pawhin inhrilh hreh lo hlawm ila, a tha hle mai ni lovin ‘kan tih ngei ngei tur’, kan vaia kan himna tur zâwk a lo ni. Tin, inchhunga lut lo pawhin pawnah engkim deuhthaw hi a inhlan theih tawh a ni tih hi i hre bawk ang u. Thu neitute dan siamin a phal a, kohhran thawhlawm chi hrang hrangte hi kan khawn dawn a nih pawhin fimkhur taka hmui leh hnar tuam ngeia ina luh chi a ni ang a, luh dawn leh chhuah dawna damdawi tuia kut sil (to sanitize one’s hand before entering the house and after leaving the house) ngei bawk tur a ni ang. Mihring leh mihring, hmui leh hnar khuha hmai tuama feet 6 emaw a aia inhlat emawa awma, thil khawih zawh apianga kut sil zel tan chuan, he hripui hi kai mai a harsat thu mi thiamte sawi leh ziah kan hre chamchi a ni.

Covid 19 vei ni lo tu emaw khan, mi pakhat, covid hri kai tih inhre loin hnai takah emaw lua kut nghat meuha a tawngtai avangin Covid kai phahin na takin dam loh phah ta ang sela, a tawngtaisaka tan chuan amah (tawngtaitu) kha khawvela ram sa hlauhawm ber a lo ni thei bawk ang. Chuvangin, he hripui lên achinah hi chuan inkawm ho leh titi ho ngaina leh nuam ti tak mai Zofate hian kan tualzal nun phung hrim hrim hi kan tih danglam hle a ngai a ni. Khawi lo kal chhuah nikhuaahte a inhlat thei ang bera awmin inkal pel ila, inthut hnaih lo thei bawk ila; thutna a awm loh pawhin inhnaih leh insi reng chunga thut ai chuan din hreh lo ila; kut invuan kher lova kut phar/lek kânga inchibaite chîng tawh ila; kawng hrang hrangin a hma aiin kan nun danah duh tuiin khawih theih leh lang thei maiah pawh a hma aiin lo thianghlim phah ila hripui leng chu mal sawmnaah kan chantir mai dawn a ni.

Eng pawh ni se, hetah hian Covid chungchang emaw a laka inven dan emaw chipchiara ziah ka tum lova, hripui len laia thu neitu tlingtena awm dan tur an zam hi chu a bo a bang awm lovin i zawm ang u tih hi a ni; chuti ni lova, hetih laia a rûka playing card kan la khel ho emaw, kan inlen pawh emaw, thut ho dual dual emaw, inhnaih taka ding/thu chunga kan titi emaw kut invuan khera kan inchibai emaw, kan la inkuah deuh thuak thuak emaw, mi dang nen meizial, sahdah, tuibur leh kuhva ilote kan la intheh mai mai emaw a nih a, chumi avanga mi dangte kan kai belhtir zel a nih chuan, mahni tan leh kan mihringpuite tan hian ‘khawvela ram sa hlauhawm ber’ kan ni thei zel dawn a lo ni; kan luhlula, kan fimkhur loh zel chuan, tawng thu chhe lovah, a mipui hi a nâwlpuiin kan la pûl fai vek thei a ni tih hre rengin a theih ang angin i fîmkhur hle teh ang u

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy