Ramsa zingah sai hi a damrei ber pawl niin an sawi thin. Kottur, Kerela a sai pakhat, a neitu ten a hminga Sonam an phuah chu kum 78 a upa niin, khawvela sai upa bera puang Guinness World Records-ah an thlen dawn a ni.
Kerela-a forest lam hotute chuan Sonam chiah hi tun dinhmunah chhianchhiah theih chinah khawvela sai kum 78 tling awm chhun a ni. A hmaa sai upa ber record siamtu chu Dakshayani niin, kum 82 a upa a ni a, he sai hi thla liamta mai kha a thi a ni. Forest Development Agency chuan Dakshayani a thih takah chuan Sonam hi khawvela sai upa ber tiin an puang ta bawk a ni.
Kappukadu assistant wildlife warden Satheesan chuan, “Chief wildlife warden atanga phalna a awm veleh hmalak nghal a ni ang. Record siam tur hian a buaipuina neuh neuhah dollar 1,000 vel sen a ngai ve a ni,” a ti.
Sonam hi a taksa hriselna a la tha hle niin a sawi a, a mit dinglam khawhmuh tlemin a fiah lo deuh tih mai loh chu a taksa hriselnaah harsatna dang a nei lo niin an sawi a, record siam tura an buaipui pah hian sai hming pawh Sonam tih atangin Somanathan ti a thlak an tum bawk.
Tunah hian Sonam enkawl nana an nikhat sum sen so hi Rs 3,028 vel niin an chhut a ni.
(THE AIZAWL POST – Phuah Pawlh)
Full>> ePaper Subscribe
