Site icon The Aizawl Post

Khawvela ui damrei leh upa ber Bobi

Nimin lawkah ui upa ber record siamtu kan rawn tarlang tawh a, kha aia ui upa zawk an hmuchhuak leh ta a, tuna Guinness World Record siamtu hi chuan record pahnih a siam a, tuna ui damlai zinga upa ber a nih bakah chhinchhiah theih china khawvela ui piang tawh zinga damrei ber record a siam bawk.

Ui hming chu Bobi a ni a, purebred Rafeiro do Alentejo a ni. Hetiang ui breed hi chawhruala an damrei zawng chu kum 12 atanga kum 14 a ni a, mahse, Bobi hi chu kum 30 a tling ta a, chhinchhiah theih china khawvela ui piang tawh zinga damrei ber a nih bakah tuna ui damlai zinga upa ber a ni bawk.

A hmaa ui damlai zinga upa ber record siamtu Chihuahua ui, Spike kha kum 23 a ni a, a record hi Bobi hian a rawn khum chiang he a ni. February ni 3-ah khan Bobi hi kum 30 leh 228 a upa a ni tawh. A hmaa khawvela ui piang tawh zinga damrei ber record siamtu chu Australia a mi Bluey niin, 1939-a a thih khan kum 29 leh thla 5 a upa a ni.
Bobi kum zat hi Portugal sorkar-in pet database an neih atangin finfiah thlap a ni a, he pet database hi National Union of Veterinarians-in an enkawl a ni. Bobi hi Portugal a Conqueiros khua a Costa chhungkua te ui a ni a, a pian hlim chuan tuna a neitu Leonel Costa chu mipa naupang kum riat mi chauh a la ni.

Leonel chuan an naupan laiin ran an ngah avangin an ui note neih thar pathum chu a nu leh pa ten tiral turin an ti a, mahse, Bobi hi chhungte hriat lohin a rukin an enkawl zui ta niin a sawi. Bobi hi 2018 khan a thawk lamah harsatna a neih avangin damdawi inah dah a ni a, chumi tih loh chu a hrisel tha hle niin a sawi bawk. Tunah chuan Bobi hi a khawmuh a fiah tawh lo va, kal pawh a kal hleithei tawh meuh lo.

Kan ran vulh te hi an than chak dan leh puitlin chak dan te en chuan an kum chiar dan hi mihring than dan nena khaikhin chuan a inthlau hle a, American Veterinary Medical Association-in ui kum chhiar dan tur an tihah chuan ui tana kum khatna chu mihring ni se kum 15 ang vel a ni a, ui tana kum 2-na chu mihring tana kum 9 ang vel a ni a, chuti a nih chuan ui kum 2 leh mihring kum 14 a intluk tihna a ni a, chumi dawt atang chuan kum 1 zel chu ui tana kum 5 angin a kal chho char char tawh dawn a, Bobi pawh hi a kum 150 chuang a ni tawh dawn tihna a ni.

Exit mobile version