Khawzawl than zelna tur ruahman lawk
Khawzawl Town Planning & Development Committee thutkhawm hmasa ber chu an chairman, deputy chief minister Tawnluia kaihhruaiin Nilaini khan Khawzawlah neih a ni a. Master Plan buatsaih mek huamchin (planning boundary) tur leh Khawzawla mipui leh sawrkar department dinhmun zirchian dan turte sawihoin, inrawnkhawm a ni.
Deputy chief minister chuan Khawzawl chu hun rei tak ‘notified town’ ni tawh mah se, district khawpui a nih takah chuan mumal taka khua a than theih nan Town Planning & Development Committee din a ni tih a sawi a. Hemi kawnga hmalakna ngaipawimawh tur leh mirethei zawkte ngaihtuah tel chunga ruahmanna siam turin member-te a chah.
Powerpoint presentation hmangin Khawzawl Master Plan buatsaih tura hmachhawp hrang hrang sawifiah a ni a. Khawzawl Planning Boundary sq.km.45 ni tura Town & Country Planning Office (TCPO), UD&PA department-in a ruahman chu a hmunah UD&PA leh Khawzawl Village Council-ten lo zirchiang leh se, an ti. Master Plan siam tura Khawzawl mipui dinhmun zirchian kawngah VC-te nen tanghoin, surveyor thlanchhuah dan tur leh training pek hun tur sawi a ni a. TCPO-in Khawzawl chhunga department hrang hrang hmalakna zirchianna tur ‘Secondary Survey Form’ a siam chu thehluh hun tiamchin an ruat bawk.
Thutkhawmah hian Khawzawla sawrkar department hotute, Khawzawl VC, YMA leh MJA aiawhte bakah prominent citizen-te an tel a ni.
Khawzawl than zelna tur ruahman lawk
![](https://theaizawlpost.org/wp-content/uploads/tap_logo-min-large.jpg)