Sik leh sa thu-ah Aizawl hi hmun nuam a ni a, vawt lutuk lo, lum lutuk lo, a tawk chiah tia sawi thin a ni. Vawiin thlengin chutiang chu a la ni a, mahse a lum lam erawh vei a ngai tih a lang.
State Meteorological Centre te chuan kum liam ta 2024-ah khan chawhrualin Aizawl hi 21.5°C a ni an ti a, ni tina khaw lum lam leh vawh lam chawhrual kh 21.5°C a nih chuan Aizawl chu a vawt lo a, a lum hek lo tihna a ni.
21.5°C hi thil lawmawm a ni a, mahse khua a lumin a lum telh telh, khaw lum hun a insawn dawn em ni tih theih a ni bawk. State Meteorological Centre-in an chhinchhiah danin, 2024 chhunga Aizawl lum ber lai chu 33°C a ni a, September ni 22 khan 33°C hi a kai. Hei hi ngaihtuah tithui thei a ni.
September chu boruak nawm lai, favang boruak thengthaw beisei hun a ni a, mahse 2024-ah khan khua a lum avangin September-ah Mizoramin favang boruak thengthaw a dawng lo a ni ang tih tur khawp a ni, Khua a lum a, a uap bawk.
Aizawl leh Mizoram hmun dang lum hun ber chu April leh May vel a ni thin a, nikumah September a lum viau mai kha State Meteorological Centre lam chuan vei tur chi-ah an ngai.
2024-ah ruah a tla hnem a, mahse a tam laia baw tlawrh tlawrh, hun danga tih tham sur lo, chutiang chu a nih deuh roh avangin ruah tui tlak dan hi State Meteorological Centre lam chuan duhthusam thlapah an ngai lo.
May atanga September thleng khan ruah hi a tam em em a, hun dangah a tam lo a, October ni 3-ah mm 25.4 a tla a, chumi hnu chuan tih tham a sur lo an ti.
State Meteorological Centre-in an chhinchhiah danin, nikum khan Mizorama ruah tui mm 2295.9 a tla a, May ni 28-a mm 205 tla kha 1985 atanga ruah tui tlak dan an chhinchhiah chinah ni khat thil thu-a ruah tui tlak tam ber tum a ni.
1985 atangin khawchin leh sik leh sa hi an chhinchhiah a, 1985 atanga 2024 thlenga Aizawl vawh lam leh lum lam hi chawhrualin 20.7°C a ni a, hei hi nuam tawk tak a ni.
Khua a nuam, a lum lamah vei tur a awm thung
