Daily Newspaper

Khualmualah United an chak

11

Ninga zan khan English Premier League-ah inkhel pahnih a awm a. Sheffield United muala lenglut Manchester United chuan si an phurh hmasak zet hnuin hnehna an chang let a, hma an sawn hret. Inkhel dangah Aston Villa leh Burnley te chu goal awm lovin an inhnehtawk ve thung.

Sheffield United hian an mikhual United lakah bul an tan tha hle a, minute ngana lekah goal an thun nghal. Sheffield United-ah loan hmanga lo khel tawh si nghak Dean Henderson ball petchhuah chu Oliver Burke chuan lo dang in, David McGoldrick tan a siamsak a, McGoldrick chuan awlsam taka pet goal in hmahruaina goal a thuh. Hma takah goal chhuah mahse United an buai mai lova, an khel tha zui ta viau thung. Minute 26-naah Lindelöf siamsak atangin goal an a thun a, an si phurh a sut. Minute 33-naah Anthony Martial chuan hma an hruai letna goal a thun zui leh a, chawlhlawk a nih chuan 2-1 in hma an hruai hman tawh.

Chawlhlawk hnu lamah pawh United an khel tha chhunzawm zel a, goal pawh an thun leh nghal thuai. Minute 51-na lekah Martial siamsak atangin Marcus Rashford chuan goal a thun zui leh zat a, an hmahruaina a tizau. Blades hian an si phurh sut ngei tumin tan an khawh a, khel tha thakhawt viau mahse an hlawhtling mai thei lo. Hun tawp dawn hnaih minute 87-naah hmahruaina gaol thuntu McGoldrick chuan Blades goal hnihna a thun zui leh a, inkhel boruak a nung thar leh zual a, inkhel a hmuhnawm leh zual sauh. Blades hian an si phurh sut zawh ngei tum mahse goal dang an thun belh thei tawh lova, an mualah uiawm takin an tlawm zui ta a ni.

Season liam taa khel tha tak Sheffield United hi season tharah an khel chhe hle a, vawi 13 khel tawh in, point khat chiah an la hmu. English top-flight club zingah season tir khelh 13 chhunga point hlawhchhuak tlem ber an ni. Season liam ta khan kai thar zinga chetha ber pawl an ni a, tun season ah erawh chuan EPL team 20 zinga che chhe ber an ni mek thung.

Old Trafford-ah chak harsat thin mahse Manchester United chu khualmualah an chetha chhunzawm zel thung. Khualmualah vawi 10 an chak zawn tawh a, English top-flight history-ah khualmuala vawi 10 chak zawn thei palina an ni a, an ni hmaah hian Spurs (10 in 1960), Chelsea (11 in 2008) leh Manchester City (11 in 2017) te an ni. Khualmuala chak zawn rei record siam turin vawihnih chak an la mamawh a, vawihnih an chak zawn leh thei a nih chuan an hmelma Manchester City record an thaichhiatsak dawn a ni. Ole Gunnar Solskaer hnuaiah Marcus Rashford a chetha chhunzawm zel a, inelna hrang hrangah goal 43 thun tawh in, United player zinga chetha ber a ni. Sheffield United hian Pathianni zan hian Brighton an hmachhawn zui leh ang a. United hian thawhtan zanah Leeds United an mikhual thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy