Ni thum awh tur Aizawl-a Mizoram Travel Fest 2025 huaihawt chu Nilaini khan Tourism minister Lalnghinglova Hmar hoa neih tan a ni. He Fest hi tourism-in hma a sawn theihna tura inrawnkhawmna, zirhona leh indawrtawnna hun atana Mizoram Tourism department leh sawrkar laipuia Ministry of Tourism tangdun buatsaih a ni a; October 10 thleng a awh ang.
Tourism minister hian kum reilote chhungin Mizoramah khualzin nasa takin an pung tih a sawi a. Sairang thleng rel lo lut avangin an pun belh zel pawh a rinawm, tiin, khualzin lo dawnsawn kawngah kan inpuahchah that a tul dawn tih a sawi.
Mizoram tlawhtu khualzin zat thang chak hle mah se, state dangte nen khaikhin chuan a la tlem tih a sawi a. Khualzin hipna ni pahfawma kut leh thildang kan buatsaih thin chu kumtin a hun nghet nei a, ‘tourism calendar’ siam tha a tih thu a sawi. “Tourism calendar siam theih a nih chuan state pawn atanga Mizoram rawn tlawh tum tan pawh a awlsam phah dawn a ni,” a ti.
‘Tourism’ tih hian state pawn khualzin chauh a huam lo tih minister hian sawiin, state chhung amite pawh khaw dang kan tlawhin tourist kan ni vek a, economy thanna atan local tourism a pawimawh tel tih a sawi a ni.
Khualzin dawnsawn kawngah tour guide, hotel, taxi/ cab service, dawr leh ei tur zuar bakah mipui inzirna tur kan la nei tih Lalnghinglova Hmar hian sawiin, “Tourism-ah chuan infrastructure, hmasawnna ruhrel din ai mahin mihring hmasawnna ngaipawimawh hmasak a tul,” a ti.
Mizoram University associate professor Dr Pankaj Kumar chuan Mizoram-in tourism lama hma a sawn theihna tura khawtlang thuamthat pawimawhna leh hmalak theih dan tur a sawi a ni.
Travel Fest hawnna inkhawm zawh hian Aijal Club Park-ah Mizo Thali Cooking Competition neih a ni a. Vawiin – October 9 hian chief minister hoin hun hman a ni anga, a ni thum ni hi investor-te nen inkawmna atana hman a ni ang.
Khualzin hip luh tam dan tur leh dawnsawn dan tha sawiho
