Pachhunga University College Mizo Department buatsaih, ni hnih awh ‘Khuarel leh Thu leh Hla Inkungkaihna: Mizo Thlirna atangin’ (Ecocriticism and Environmental Studies : A Mizo Perspective) tih chu Thawhtanni khan Environment, Forest & Climate Change minister TJ Lalnuntluanga chuan a hawng.
Thu leh Hla leh environment humhalh chu a inkungkaih thuk hle a; thing leh mau, nungcha leh thilsiam mawina leh an tangkainate chu thu leh hla thiamten an phochhuak tha hle tih TJ Lalnuntluanga hian sawiin, “Mizo hla phuahtu hmasaten Zoram mawina, lui leh tlang, thing leh mau leh nungcha chungchang an tarlante kha a hlu hle a, tunlai hunah chutianga infuihna thu tha chu kan la mamawh reng a ni,” a ti. Environment humhalhna lam kaihhnawih seminar an buatsaih chu lawmawm a tih thu a sawi a ni.
Thing leh mau, nungchate humhalh turin sawrkar pawhin a theih ang angin hma a lak mek tih EF&CC minister hian a sawi a. Luipui kam humhalh turin project lian tak kalpui mek a nih thu a sawi. G20 summit thupui – “One Earth, One Family, One Future” tih chuan khawvel mihringte chhungkaw pakhat, mamawh leh harsatna inangtlang kan ni tih a tarlang a ni, tiin, he thupuiin a tum pawimawh tak zing ami chu, khawvel lum zel (global warming) ti ziaawm tura tan lak a ni tih a sawi.
Seminar hi G20 summit denchhena Mizoram University bultuma Mizo department PUC-in a buatsaih a ni a. Mizoram pawn atangin rerource person pathum, Aizawl pawn atangin pathum, Aizawl atangin 13 an tel.
Seminar-a keynote address sawitu Prof R Thangvunga chuan mihring chu thilsiam zinga derdep ber ni mah se, a bul vela thil awmte enkawl tur leh venghim tura khuanu duan a ni a. Chuti chung chuan mamawhna leh chhan hrang hrang avangin khuarel tihchhiat a ni a. Mihring nun nena a inkungkaihna hi thu leh hlaah a lo lang thin, tiin a sawi a ni.
Khuarel leh thu leh hla inkungkaihna zir ho
