North Korean leader Kim Jong Un chuan an ram chuan nasa zawkin nuclear ralthuam siamin hei bakah hian ‘new Cold War’ thleng mekah United States hmachhawn turin ram dangte nena thawhhona tha zawk a nei tur a ni, tiin a sawi thu North Korea state media chuan a tarlang.
Korean Central News Agency (KCNA) chuan heng thute hi Kim chuan Parliament session nihnih awha neihah a sawi niin a sawi a, nuclear weapons programme nasa zawka kalpui a nih theih nan constitution pawh siamthat a ni a ti bawk.
Supreme People’s Assembly session hi tun hnaia Kim-an Russia Far East tlawha Russian president Vladimir Putin nena inbiakna an neih hnu lawka koh a ni.
Khawthlang ramte chuan North Korea chuan Ukraine indona kal mek zelah Russia-in a mamawh em em ralthuamte a pe dawn tiin an sawi a. Russia thung chuan North Korea hnenah hian nuclear leh missile system technology te a hlan ve thung ang tiin an sawi a ni.
North Korea-in pandemic lockdown a tihtawp hnuah Kim chuan Moscow leh Beijing nena inlaichinna siamthat tumin nasa takin hma a la mek a. Khawvel chuan ‘new Cold War’ a hmachhawn mek tiin hei vang hian North Korea chuan a nuclear theihna chu a tipung tur a ni tiin a sawi bawk.
North Korea parliament chuan lungrual takin nuclear ralthuam tam zawk nei tura hmalakna kalpui an remti a, hei bakah hian North Korea chuan regional leh global peace lama hmalakna zau zawk a neih theih nan nuclear ralthuam tam zawk neih chu tihmakmawh an ti bawk.
North Korea hian nuclear forces-building policy chu basic law angah ngaiin tute tihbuai mah remtih a ni lo, tiin Kim chuan assembly-a thusawina a neihah a sawi zui bawk.
Kim chuan United States chuan nasa zawka chetlakna nei mekin South Korea leh Japan-te nena inthurualin ‘Asian version of NATO’ siam an tum a ni a ti bawk a. Heng te hi hlauhawm tak an ni tiin a sawi zui bawk.
Tun hnaiah Korean Peninsula-ah boruak a sosang hle a, kum 2022 hnulamah North Korea chuan missile 100 chuang kapchhuak tawhin, chutih laiin US pawhin Asian allies-te nena thawhhona nasa zawkin a kalpui mek bawk.
Kim Jong-un an ralthuam siam zel tum
