North Korean leader Kim Jong Un chuan a sipaite chu hmelma ram ten run an tum tia hrilhin inralring reng turin a hrilh tiin North Korean state media chuan a tarlang a. Hei hi US, South Korea leh Japan tena naval exercise an neih vang a ni.
Kar kalta atang khan US leh South Korean sipaite chuan sipai nunchan zirna an nei tan tawh a. North Korea chuan US telna sipai nunchan zirna tin te chu amah run tuma inpuahchahna angah a ngai a, Washington erawh chuan an thawhpui ram te nena invenna lama hmalakna tiin a sawi thung.
Kim chuan Navy Day puala thusawi a neihah Korean Peninsula tuipuite chu nuclear war tawng thei dinhmunah US kaihhruaia huangtauna kalpui mek avangin a awm mek reng tiin a swi niin Korean Central news Agency chuan a sawi a.
US chuan sipai nunchan zirna kalpui rengin US weapons tha ber ber te chu Korean Peninsula bul hnaiah chhawpchhuah a ni ti bawkin Tun hnaia US, South Korea, Japan tena summit neiha defense cooperation tihchak an tum chu a sawisel bawk.
Kim chuan US President Joe Biden, South Korean President Yoon Suk Yeol leh Japanese Prime Minister Fumio Kishidate chu ram pathum te “gang bosses” a ti bawk a.
“Thil thleng mek avangin navy te chuan indo hmachhawn tura an inpeih a ngai a, indo inralring rengin hmelmate hneh thei tura an inpuahchah reng a ngai,” tiin Kim chuan a sawi.
Thawhlehni khan South Korean-US-Japanese drill chu South Korea chhim lama Jeju island chhehvela international water-ah military drill neih a ni a. He training hi North Korean missile kahchhuah hriat vat theihna leh invenna bakah inhrilhhriat tawn zung zung theihna tura tih a ni.
US leh South Korea bik chuan August 21 khan ni 11 awh bilateral drills an lo nei tawh a. Kum tinin Ulchi Freedom Shield training nei thinin computer-simulated command post exercise a ni thin a, kuminah chuan field exercise an nei tel a ni.
North Korea hian US, South Korean military drills neih chu missile test-in a chhang let tlangpui a. Kar kalta Ningani khan spy satellite kahchhuah a tum chu a hlawhchham thung a, khami ni kha military drill intan ni tak a ni bawk.
Kum 2022 atang khan North Korea chuan weapons tests tum 200 chuang a kalpui tawh a, a tam ber chu nuclear-capable missile te vek niin US leh a thawhpui South Korea leh Japan te beih nana a duan a ni ber. Mithiamte chuan North Korea hian ralthuam lama a theihna chu US laka a duh zawng kar nan hman a tum an ti.
North Korea missile test uar vang hian US leh South Korea te chuan military drill an tihzauh phah thung a, tunah pawh Japan chu rinlut telin kumin July thla khan United States chuan kum sawm li hnuah South Korea-ah nuclear-armed submarine a tir lut nghe nghe a ni.
Tun thlatir lam khan US, South Korea leh Japan leader te chuan Camp David ah trilateral summit hmasa ber an nei bawk a. Meeting neihnaah kumin kum tawp hma ngeiin real-time missile warning data inhrilhhriatna tur peihfel nise tih leh kum tinin trailateral exercise neih ni se an ti bawk.
Kim Jong un-a’n sipaite inralring turin ti
