Kim Kardashian leh Lewis Hamilton Tokyo lamah

Kim Kardashian leh Lewis Hamilton Tokyo lamah
Kim Kardashian, kum 45, leh Formula 1 star Lewis Hamilton, kum 41, te chu an inzui niin thulengvak a awm mek a, chutiang karah chuan an boruak nemnghet niawm takin Tokyo lamah khawlai an leng dun a, an inhuat loh hmel tlat.
Kardashians star hi Formula 1 tum sarih champion tawh Hamilton nen hian Tokyo khawlaiah an chhuak dun a, Kim-i hian Lewis hi a kuah deuh chial mai a, Kim-i laizawn Khloe Kardashian te nen an chhuakho.
February thla khan Europe lama thlawk chhuak turin private jet-a an lut dun lai an lo hmufuh a, chuta tang chuan anni pahnih inkarah hian ri deuh ret ret a awm niin an sawi tan nghal a, kum tirah, New Year’s Eve party, Aspen lamah an lo hmu dun tawh bawk nen, an inkar boruak an tinzawn thiam nghal tlat. Chutah kumin Super Bowl-ah khan an thu dun a, an titi tui hmel leh viau bawk.
Kim hian pasal pathum then tawh mah se “tiam tlat e” tih pui tur a neih chuan a la hreh phah vak chuang lo tih te pawh a lo sawi tawh a, 2022 khan “Hmangaihna hi ka ring a. Chuvangin tum khat mo han ni leh te chu ka hnial lem lo ang. A tum lina te chu kan vanneihpui tawh mahna,” tiin The Kardashians-ah a lo sawi tawh.
Kim hi Damon Thomas nen 2000 atanga 2004 thleng inneiin, Kris Humphries nen 2011 atanga 2013 thleng an innei leh a, chutah Kanye West nen 2014 atanga 2021 thleng innei lehin fa pali- North, kum 12, Saint, kum10, Chicago, kum 8, leh Psalm, kum 6, te a nei tawh.
Lewis Hamilton hi chuan a hmangaihna zinkawng a thup thei riau mai a, khawvelin a hriat laih khawpa a zui ve chu Nicole Scherzinger kha niin, 2007 atanga 2015 thleng an inzui a, a lar tak tak hma, 2003-2007-ah Josia Ma nen inzuiin, 2023 khan Shakira nen an inzui ve niin thu a thang a, mahse, confirm a ni ta lo. Rianna, Rita Ora, Kendall Jenner, Gigi Hadid leh Nicki Minaj te nen pawh an lo sawi zawm ve deuh vuai vuai tawh bawk.