King Charles III in cancer a vei thu puang chhuak

King Charles III in cancer a vei thu puang chhuak
King Charles chu a cancer tiin Buckhimham Palace thuchhuah chuan a tarlang. Eng cancer nge a nih erawh sawi lan a ni lo va, a prostate lian inentirna lamah cancer a nei tih hmuhchhuah niin mahse prostate cancer erawh a ni lo.
Thawhtan atang khan treatment la tanin hei vang hian public duty a neih tur hrang hrang te chu a thulh a ngai rih dawn tiin Palace thuchhuah chuan a tarlang bawk.
Kum 75 a upa King chuan a eng zawnga thil thlirin a rang thei ang berin a mawhphurhna a chhunzawm leh theih a inbeisei tiin thuchhuah chuan a tarlang bawk a.
King Charles chuan cancer a neih thu chu a fapa te pahnih hnenah a hrilh zui nghal bawk a. Prince of Wales nen chuan inbe pawp nasa zual an ni a.
Duke of Sussex, Prince Harry, United States a cheng mek pawhin apa bia in a rang thei ang berin UK ah amah hmu tura kal a tum bawk.
King Charles hian Sandringham, Norfolk atangin London ah Thawhtan khan letin treatment a la tan zui nghla a ni.
Public events ah inlan lo mahse King chuan head of state a nih angin constitutional role a la chhunzawm dawn tho va, paperwork leh private meeting te a la kalpui tho ag.
Kartina Prime Minister Rishi Sunak nena inhmuhna an neih pawh chhunzawm zel a tum bawk a ni.
Constitutional mechanism awmin head of state in official duty a tithei lo a nih chuan a aiawh turin monarch chuan ‘counsellors of state’ a ruat thei a.
Chung mite chu tun dinhmunah chuan Queen Camilla. Prince William, Princess Royal leh Prince Edward te an ni a. Prince Harry leh Duke of York te chu an tel ve lo a chhan chu non-working royals an nih tawh vang a ni.
Prince William pawh a nupui Catherine, Princess of Wales in thla kaltaa abdominal surgery a neih avangin public engagement lamah a inhnukdawk a. Mahse, Thawhtan khan public duty a chhunzawm leh tur thu a puang thung.
King Charles hian Pathianni pawh khan Sandringham-ah Biak In ah a la inkhawm a, minute 10 vel ke a kalin karkhat kalta vel khan London private hospital ah a inentir atangin a cancer tih hriatchhuah nia sawi a ni.
A prostate lam sawisela inentirna lamah cancer a lo nei ve reng tih hmuhchuah a ni a, mahse, a prostate erawh a cancer lo tia sawi a ni thung a. .
King Charles chuan a cancer vei thu chu mipui nawlpui hriata pholan a duh zawk tiin Buckingham Palace thuchhuah chuan a sawi a, a chhan ber pawh cancer kaihhnawih charity tam takah Prince of Wales a nih lai atanga a inhman nasat vang a ni.
“His Majesty chuan cancer veite a thlawp a, cancer vei chhungte leh health professional te thlawp tlat thin tu a ni” tiin Palace thuchhuak chuan a tarlang a. A cancer neih thu pholan pawh mitam zawk tena an prostate te enfiah fo tura a duh vang a ni tiin tarlan a ni bawk.
Royal Society of Medicine te pawh King Charles an huaisen taka cancer a neih thu a tarlang chu an fak thu sawiin cancer chuan thleibik a nei lo an ti bawk a, mipui nawlpui te chu cancer screenign nei fo turin an ngen zui bawk.
UK mipui pahnih zela pakhatin an dam chhungin cancer eng emaw an vei ziah anga ngaih a ni a. Cancer chi hrang hrang 200 chuang awmin UK a tlanglawn ber chu hnute, lung, prostate leh bowel cancer te niin NHS website chuan a tarlang.
Prime Minister Rishi Sunak chuan King Charles chu a dam that vat a duhsak thu sawiin Labour leader Sir Keir Starmer leh Commons Speaker Sir Lyndsay Hoyle te pawhin duhsakna an hlan a. US President Joe Biden pawhin King Charles chu a biak vat tur thu a sawi bawk.
US president hlui Donlad Trump pawh King Charles chu “mi danglam tak, ka president lai atanga ka hriat chian a ni” tiin a sawi a. “A dam that leh vat theih nan kan duhsak takzet a ni” tiin a sawi bawk.
Canadian Prime Minister Justin Trudeau pawhin, “Canadians te leh khawvel ram tina mi ten His Majesty King Charles III an cancer treatment a neih mek kan ngaihtuah a ni. Duhsakna kan hlan a, a dam that leh vat kan beisei a ni” tiin a sawi bawk.
King Charles hian Royal tradition hnawlin a cancer hi a puang anga ngaih a ni a, kum za tel tehmeuh chu Britain royal family te chuan an hriselna chungchang mipui nawlpui hriatah an puang duh ngai lo. Uk monarch te hian thuneihna sang tak an neih avangin an damlohna emaw sawi lan chuan an thuneihna a tihchakloh an hlau thin a, hei vang hian an hriselna chungchang chu sawilan in a awm mai mai ngai lo.
King Charles pu King George VI pawh khan lung cancer neiin February 1952 a kum 56 mi nia a thih hnuah chauh cancer a vei tih mipuiin an hre chauh a ni.
King Charles hian September 2022 ah a nu Queen Elizabeth II thih hnuah lal thutthleng a luah zui a.
King Charles leh Queen Camilla te chuan May thlaah Canada, Australia, New Zealand leh Samoa te tlawh tum an ni a.
October thlaah Commonwealth Heads of Government Meeting ah tel tur a ni bawk. Mahse, chung te chu tun dinhmunah chuan a tel ngei dawn em tihchian theih a ni ta lo.