nder Ace Frehley, kum 74, chuan mual a liam ta tih nimin khan thuchhuah siamin a chhungten an puang a, “Ka rilru a hrehawmin kan na takzet an ni. A hun hnuhnunga hian vanneihthlak takin hmangaih leh duat takin, thlamuanna leh tawngtaina nen kan thlah thei hlauh a ni. Amah kan hriatreng tur, a nui tawm te, a chakna leh ngilneihna te kha a ni. A damchunga a hlawhtlinna ropui tak tak te thlir kir chungin Ace chu kumkhuain kan hrereng tawh ang,” an ti.
Ningani kalta khan TMZ chuan Ace Frehley hi thluaka thisen tling avangin ventilator nena enkawl a nih thu an tarlang tawh a, Ace hi kar kalta khan tlusualin, hetah hian a tluakah thi a tling ta a ni. A tirah chuan tlusual satliah ang deuh chauhin an puang a, mahse, Antelope Valley Fair-a a performance neih tur pawh a cancel zui a, “Damdawi inah a lut zuai a, mahse, ngaihtuahawm a ni lo, doctor ten zin chhuah an phal loh avangin a chawlh rih a ngai a ni,” an ti.
Frehley hi 1973-a KISS dintute zing ami niin, 1982 thlengin band lineup-ah a tel a, a hnu deuhah, 1996-a an band reunion tour hit takah tel lehin, 2002 thleng band-ah a tel zui ta zel a ni.
An band album hlawhtling tak tak 1977-a an tlangzarh ‘Love Gun’ leh ‘Alive II’ te chu Billboard 200 chart top 10-ah a lang thei nghe nghe a ni. Frehley hian 1984 khan ama pualin 1984 khan Frehley’s Comet a din a, he hard rock band hian album pahnih leh EP an tlangzarh hman a, chumi hnuah 1989 khan solo album ‘Trouble Walkin’ a tichhuak leh a, he album-ah hian KISS-a a bandmate thin Peter Criss-a’n a pui ve zuai bawk.
Nikum February thlaa Billboard-in an kawmnaah Frehley chuan KISS original lineup reunion a la beiseiawm thu a sawi a, thlaleh maiah hian orginal KISS bandmate Gene Simmons leh Paul Stanley te nena perform-ho tur an ni nghe nghe a, mahse, KISS original lineup reunion chu a awm thei dawn ta lo a ni.
KISS co-founder & Guitar Hero- Ace Frehley a thi
