Thirsakawrin India ram state zawng zawng a fang chhuak a, UT panga a tlawh bawk. Km 17000 chuang a inkhalh a, a la kham lo!
“State panga vel tlawh tur la awm se, ka la peih tho ka ring. Hetiang hi ngaiah ka neih tawh,” a ti.
Boruak a thianghlim theih nana theihtawp chhuah a tul thu aupuia India ram fang chhuaktu Vanlallawmzuala Varte, LZ-a tia koh hian India ram a fan chhuah hnuah November ni 5 khan Mission Venga an in a haw thleng a, mipuiin an ngaihluin an lawmpui hle.
January ni 25-a Aizawl atanga zin chhuak LZ-a hian October ni 22-ah state a tlawh kim a, state zawng zawng a tlawh hnuah thirsakawr bawkin Mizoram panin a haw leh.
Thla kaw chuang a zin chhung hian thirsakawr ngatin km 17043.10 a tlan a, hetianga thui tlan hi India ramah record hmuh tur a awm lo.
Thirsakawra state zawng zawng fang chhuak tih leh, thirsakawra tlan thui ber tihah, a khawi emaw zawk zawkah India ram record a siamah ngaih a ni a, India book of records lamin hei hi an buaipui mek.
“Chauh chu ka chau ve tho, ka la mu tha lo em a,” a ti a, mahse “Hetiang hi ka nunah a bet tawh a, ngaiah ka neih tawh. Chau han tih tur em em chu ka ni lo, state dang tlawh tur la awm se, state panga vel pawh ni se ka la peih ka ring,” a ti.
Mizoram mipuiin an lo ngaihhlut avangin a lawm a, “Mumang a ang,” a ti hial.
January ni 25-a tu khawkha hriat lohva zin kawng a zawh tan dan te a ngaihtuah a, Mizoram pawn hmun hrang hrangah Zofate’n an lo ngaihhlutpuizia te a ngaihtuah a, a rawn haw hnuah mipuiin ropui taka an lo hmuak tih te, chung zawng zawng a ngaihtuah chuan mumang a ang a ti a, “Hetianga thirsakawr khalh kan ngaihlu hi ka lawm a ni,” a ti.
A thupui tlan kualpui ‘ride to clean air’ tihin rah a chhuah a beisei thu a sawi a, “Vawilehkhata lang nghal tur chi a ni lo a, mahse state leh UT hrang hranga ka mi kawmte, ka thusawi ngaithlatute leh kalkawnga min hmutute rilruah hna a thawh ka ring a, ka beisei bawk,” a ti.
Instagram lamah hnam dang, amah be zuitu an thahnem a, a thupui aupui chungchang an rawn sawipui thin.
Km 17000 chuang a tlan hnuah la kham lo
