Mizo Zirlai Pawl (MZP) leh Mizoram Volleyball Association (MVA) te tangkawpin an buatsaih Inter Higher Secondary School chu October ni 17, Zirtawpni khan khelh zawh a ni ta a, mipa lamah Govt. KM HSS an thiam ber a, St Joseph HSS hnehin an champion. Hmeichhe lamah Synod HSS an champion ve bawk.
Mizo final-ah 2024 final-a lo inhmachhawn tawh KM HSS leh St Joseph te bawk an inhmachhawn nawn leh. An intum hmasakah uiawm taka tlawm KM HSS in an tlawm tawhna phuba an la a, champion lai St Joseph hi set hloh lovin an hneh.
Final-a KM HSS leh St Joseph HSS te hian inkhel hmuhnawm tak an lantir a, set khatnaah an inhnehtawk nghal hle. Inkhel hmuhnawm takah KM in set an la hmasa. Set hnihnaah inkhel a hmuhnawm leh zual hle a, deuce-ah KM an chungnung zui leh a, set an la nawn leh. Set hnih an lak zawn hnuin an khel tha chhunzawm viau a, set thumnaah hian an khingpuite hi point 11 bak an pe duh lova, champion lai St Joseph lakah hian 25-22, 27-25 leh 25-11 in hnehna an chang a, phu takin an champion zui ta a ni.
Mipa lamah hian Joseph Malsawmtluanga, KM HSS chu best setter ah thlan a hi a. Joseph-a kawppui fuh tak Jacob Zonunmawia chu ‘Best Spiker’ ah thlan a ni bawk.
Mipa lamah KM HSS an champion lai hian hmeichhe lamah Synod HSS hneh zo lovin KM HSS hmeichhiate an champion zo lova, champion kawp an tumna an puitlin zo lo.
Hmeichhe final-ah Synod leh KM te an inhnehtawk viau a, set khatnaah an deuce zak zak hnuin Synod in harsa takin set an la. Harsa taka set khatna an lak hnuin Synod an khel tha chhunzawm viau a, awlsam takin set hnih an la zui a. KM lakah hian 29-27, 25-15 leh 25-6 in hnehna an chang a, ropui takin an champion zui ta a ni.
Hmeichhe lamah hian KM HSS tana thawhhlawk tak Zakimi Hnamte chu ‘Best Setter’ ah thlan a ni a. Esther Lalrinzeli, Synod HSS chu ‘Best Spiker’ ah thlan a ni ve thung.
KM HSS an thiam ber
