Lawngtlai district kaltlanga Asia chhimchhak lam nena insumdawn tawnna tur kawngpui – Kaladan Multi Modal Transit Transport Project a taka hman a nih hunah leh rel kawngin state chhung thuk zawka a pawh hnua Mizoram mipui ei leh bar kawng bakah nunphung leh hnam ziaa nghawng a neih theih dan leh lo inhmakhua dan tur sawikhawmna state huapin Nilaini khan Aizawlah neih a ni.
Hemi chungchang zirchiang tur hian Mizoram sawrkar chuan ‘Committee to Study the Socio, Cultural and Economic Impact of the KMMTTP and the Railway Line from Bairabi to Sairang’ a din a, chairman-ah MLA T Lalhlimpui niin, member secretary chu Planning & Programme Implementation department lamin an chang a, sawrkar mi leh heti lama ngaihtuahna seng mi member-ah ruat an ni.
Tun tuma inrawnkhawmnaah hian mithiam sawm bik, tlawmngai pawl hrang hrang bakah a nghawng nat tur hmuna cheng aiawhin Mara leh Lai zirlai pawl hruaitute leh zirlai engemawzat an tel.
Sawrkar hotu atangin Home minister K Sapdanga, adviser to chief minister (Planning) TBC Lalvenchhunga, adviser to chief minister (Political) Lalmuanpuia Punte leh MLA Lt.Col. Clement Lalhmingthanga ten an hmanpui bawk.
Study Committee chairman chuan chief minister-in lo inruahman lawk a duh avanga he Committee din a ni tih a sawi a. Mizote inralrinna dar an vua a, KMMTTP hawn mai tur leh rel lut hi Zoram hmalam thlir chungin, engtin nge kan inbuatsaih thiam ang, sawiho a tul tih a sawi a ni.
Rel kawng tihhmasawnna atan cheng vaibelchhe 97 hmangin siam belh zel a ni a, hei hi sumdawnna leh veivahna atanga thlir chuan thil tha ni mah se, hnam ang lak a, chhut tel a ngai tih sawiin, “Mizo hi kan ral dawn lo, chimral erawh kan ni thei. Hnam awm mah ila, Mizo identity anga thu kan neih loh a, state thenawmah a ram neitu Tripuri-te tlanga an awm zo ang hi kan hmaah a awm ve thei tho,” a ti.
He hun hi a bul tanna nise, ram hmasawnna tur leh dinchhuahna atan hetiang hun hi la buatsaih chhoh zel tum a ni tih T Lalhlimpuia hian a sawi a. Mithiam leh thalaiten ngaituahna seng zel turin a ngen tih a sawi a ni.
KMMTTP kawngpui leh rel lutin Mizoram a nghawng dan tur zirho
