Hun pui thleng turah eirawngbawlna gas-a harsatna a awm lohnan sawrkar leh IOC Limited chuan hma an la tih supply minister B Lalchhanzova chuan tun hnai khan a sawi a. Krismas leh kumthar ruai siamna atan kohhran-in LPG domestic bur an hmang thin chu, dan phal loh thil a nih bawk avangin a tam thei ang gas commercial bur hmang turin an ngen tih a sawi a; distributor ho pawh inbuatsaih se an duh tih a sawi bawk.
Mimal chhungkua tena an hman tur bik eirawngbawlna gas ‘domestic cylinder’ leh, sumdawnna leh eizawnna thila hman tur bik ‘commercial cylinder’ a awm hrang tih hi chu tlang hriat a ni a; chutih rualin, kohhran emaw, pawlin emaw, an han ngen takah chuan, inhmaizahna avangin distributor lam hian domestic cylinder hi an lo pe chhuak ve leh mai thin te pawh a ni thei ang a; indem hleih theih pawh a ni awm lo e. Domestic cylinder hi mipuiin man tlawm zawka an lei theih tura siam a ni a, commercial cylinder aiin cheng zaruk deuhthawin a tlawm a. Kohhran buatsaih Ruai atan gas bur tam tak hman a ngaih thin avangin, Kohhrante pawh hian insenso nep zawkna tur hi an ngaihtuah ve thin ang tih pawh a rinawm viau a ni.
Dan phal loh ni na na na chu, kohhran meuh chuan bawhchhiat hram an tum lem tawh lovin a rinawm a. Tunhmaa ruai buatsaihna atana domestic cylinder an lo hmang thin te pawh kha, ‘dan phal loh’ tih an hriat kher loh vang te pawh a ni thei a, distributor lamin ‘dan phal loh’ tih hre chunga an lo pe chhuak tho a nih chuan, chu chu ‘dan bawhchhiatna bultanna’ chu a ni ber ang a. Chutih rualin, dan phal loh tih hre chung renga kohhran lamin distributor-te an lo nawr lui thin a nih bawk chuan, kohhran ten dan an lo bawhchhe reng thin tihna te pawh a ni zel awm e.
Tunah erawh, supply minister meuhvin ngenna a siam a, kohhran ten domestic cylinder an hmang thin chu “Dan phal loh” tiin a sawi tawh a, chuti chunga distributor-te atanga domestic cylinder kher dil lui tlat an awm a nih chuan thil dik lo tak a ni dawn a, kohhran tan chuan thil inhmeh lo tak a ni dawn a ni.
Chutih rual erawh chuan, Krismas leh Kumthar ruai buatsaih nan hian, commercial cylinder-in a daih vek seng bik lo maithei a, domestic cylinder hman loh theih lohna pawh a awm ve ngeiin a rinawm.
Eng pawh ni se, a pawimawh ber chu, Kohhran atanga dan zahna, dan ngaih pawimawhna hi inzirtir tur kan ni tih hi a ni awm e. Eirawngbawlna Gas chungchangah chauh pawh a ni lo, sawrkar sum hmanna tur ruahmansa lo pawhpen pui vena ang chi te pawh thil awm thei a ni a, chungah te pawh chuan Kohhran ber hi entawn tura a awm a pawimawh a ni.
Kohhran leh ‘gas commercial cylinder’
