Vote thlak ngaipawimawh tura mipui zirtirna kawngah leh inthlan muanawm leh fel neih a nih theihna tura kohhran, tlawmngai pawl leh thuthar thehdarhtute hmalakna lawmawm a tih thu Lawngtlai district election officer Joseph H Lalramsanga chuan a sawi.
Ningania inthlan buaipuinaa hotute leh a kaihhnawiha hma latute nen thutkhawmah DEO chuan Lawngtlai district-a awm Tuichawng, Lawngtlai West leh Lawngtlai East Assembly biala mipui aiawh tur thlanchhuahna inthlan hlawhtling tak kalpui a ni chu lawmawm a tih thu sawiin, thawh hona tha tak a awm vang a ni tih a sawi.
November 5 zana Jarulsury Polling Station pana kalchhuak lirthei chesual chu pawi a tih thu leh he chetsualnaa nunna chan Pu Z Lalmuanzuala, constable 4th IR Bn chhungte a tawrhpui thu sawiin, sawrkar atanga tih tur awmte bawhzui zel a ni tih a sawi.
Inthlan felfai leh langtlang kalpui a nih theih nana chanvo hrang hranga mawhphurtu nodal officer, master trainer, sector magistrate, presiding officer leh polling officer-te chungah lawmthu sawiin, Lawngtlai district-a polling station thenkhat chu inkalpawh leh inbiakpawhna kawngah district dangte aia hnufual zawk ni chung si a, hneh taka an mawhphurhna an hlenchhuak chuan an inpekna leh an hna chanpual theuha an rintlak zia a tilang tih a sawi a ni.
Venhimna kawnga polling party leh mipui thlanmuantu, polling station tina police duty-te leh mobile network chhiatna hmuna inbiakpawhna khaihlak loa viltu MPRO hnathawh chu fakawm a tih thu Joseph H Lalramsanga hian sawiin, polling party-te lo dawngsawng a, an mamawh ngaihven saktu BLO-te leh lirthei khalhtute chungah lawmthu a sawi.
RO, assistant RO, election officer leh staff-ten ruahmanna siam danah leh a tul ang bawhzuia che chhuak thin DC office-a thawktute chungah te, inthlan hlawhtling tak kalpui a nih theih nana political party hruaitute thuawihna leh tlawmngai pawl hruaitute telpuinaah, vote thlak ngaipawimawh tura kohhran kaltlanga mipui hnena ngenna siam bawhzui kawnga kohhran hruaitute hmalakna leh, mipui aiawha rorel tur thlan chhuah kawnga hriat tur pawimawh puanzarnaa MJA hmalakna lawmawm a tih thu DEO hian a sawi bawk.
Kohhran, NGO leh MJA chungah lawm
