Kohhran ni pawimawh hmang

Kohhran ni pawimawh hmang
January 11 kha Mizoram Presbyterian Kohhran din tan ni a ni a. Tualchhung kohhranten an remchan dan angin chhun leh zan lamah hun an hmang.
Tualchhung kohhran tam ber chuan zanah hun an hmang a. Chhun leh zan atan thupui zir tur ruahman niin, chhunah ‘Chanchin Tha leh Kohhran’ tih leh zan lamah ‘Hei leh chen hi Lalpan min pui a ni’ tih zir ho a ni.
Kum 2014 Synod Inkhawmpui chuan “Kan kohhran din kum chu 1894 January 11 a ni e,” tiin a pawm a. 2016 Synod Inkhawmpui chuan “Mizoram Presbyterian Kohhran din tan ni hi Synod Ni pawimawhah telh ve ni rawh se” tiin a rel leh a; Synod Executive Committee-in bawhzuiin “Mizoram Presbyterian Kohhran din tan ni January 11 hi kum 2018 atangin hman tan ni se – Synod Calendar-a telh nise, Synod holiday-ah tel se” tiin a rel a ni.
Mizoram Presbyterian Kohhran inchhiar hnuhnung berah kohhran member 628719 an awm a, heng zinga 304304 hi mipa niin, hmeichhia 324415 an ni.
January 11 hi MIzoram Baptist Kohhran chuan sap missionary pahnih Pu Buanga (Rev JH Lorrain) leh Sapupa (Rev FW Savidge) ten chanchintha hril tura Mizoram leilung an luh champha – Missionary Day atan a hmang a, kumin hi a vawi 131-na a ni.
Kum 1894 khan sap missionary pahnih hian hetihlaia ‘Lushai country’ tia sawiah chanchintha hril turin, January 11 khan lawnglengin Sairang an lut a ni. He ni hi Mizoram sawrkar chuan sawrkar pisa leh zirna in chawlh ni-ah a puang a ni.
Missionary Day hi BCM tualchhung kohhran hrang hrangah thupui intawm “Lalpan thil ropui tak min tihsak a” tih hmangin hman a ni a, kohhran engemawzatah chuan tlai lamah ruai an theh.
Kumtina tih dan angin, Pathianni tuk khan Zarkawta Sap missionary-te hriatrengna lungdawhah Missionary Day pual hian hun hman a ni a. Zarkawt Presbyterian Kohhran mi bakah BCM leh Salvation Army atangin mi thahnem tak an tel a ni.