Kohhran upa tharte inzir mek

Synod Multipurpose Training Centre (SMTC) buatsaih Lay Leaders’ Training vawi 223-na chu neih mek a ni.
November 14 zana a hawnna inkhawmah Synod senior executive secretary Rev. C. Zorammawia’n thuchah sawiin, Lay Leaders’ training hi a hawng a. Tun tum training-ah hian Presbytery 8 – Aizawl West, Aizawl West-II, Aizawl East, Tawi, Hmarphei, Hmarthlang, Chhimthlang leh Tuivawlral atangin Kohhran Upa 41 an tel a ni.
Training-ah hian Rev Vanlalzuata, Rev Thangzauva, Rev K Lalpiangthara, Rev Lalrinthara leh Synod finance manager Upa Lalsawmliana te chu resource person an ni.
Kohhran Upate tana Lay Leadership Training hi kum 1996 atang khan neih tan niin, tun hi a vawi 223-na a ni a; Kohhran Upa training tawh zat chu mi 7873 an ni. Training-ah hian Kohhran Upate tan kohhran enkawl dan leh inrelbawlna lam atana pawimawh chi hrang hrang zir thin a ni a, kohhran thlarau lam nun enkawl dan tha te zir ho thin a ni bawk.
Training kharna inkhawm hi November 17 (Zirtawpni) zanah neih a ni ang a, Synod moderator Rev Dr C Chawng-hmingliana’n trainee-te hnenah certificate semin thuchah a sawi ang.