Kolasib-ah National Press Day

MJA Kolasib District chuan Ningani khan Kolasib Press Club-ah ‘National Press Day’ an hmang.
He hun hmanpuitu Kolasib DIPRO C Lalhruaitluanga chuan kumin National Press Day thupui “Media in an Era of Artificial Intelligence” tih hmangin thu a sawi a. Artificial intelligence (AI) lo than chhoh zel dan leh tunlai khawvelah khawlin mihringte min thunun tawh zawk a, he hun (era) a media-te kal zel dan tur leh hmasawn zel dan tur ngaihtuah a ngai tih a sawi a ni.
“Media hmasawnna kal zelah print leh electronic media piahlamah ‘new media’ kan tih, ‘social media’ chu nasa taka larin, hei hi media huanga AI rawn inrawlh chhohna a tih theih a; eng tikah emaw chuan print leh electronic media te hi a la lem zo mai ang tih hlauhawm a ni tawh,” a ti a. Social media-ah chuan news a chak a, kan mamawh loh thleng thlengin thu thar kan hre ta a; AI nena an tan kawp hnuah phei chuan kan ngaihtuah phak bakin media kalphung a rawn khawih danglam chho mek tih a sawi a ni.
Media-in khawvel changkan ruala hma a sawn ve zel a tul angin, AI-in hmasawnna a kente pawh media miten a tha zawnga kan hman a, tan kan lo lak a ngai tih DIPRO hian a sawi a ni.