Kolasib DC Robert C Lalhmangaiha chuan nimin khan SDO(C) Kawnpui Mini Conference Hall-ah Kawnpui leh Kolasib inkar kawngpui kama Lung Quarry neitute a kawm.
DC chuan ‘National Highway humhalhna leh enkawlna chu dan hnuaia awm a ni a, lung Quarry enkawltu leh neitute chuan dan an zawm ngei tur a ni tiin, dan ngai pawimawha zawm hram turin a chah a.
DC chuan ‘Hna thawh an duh a, in eizawnna a kal zel theih nan Highway leh a reserve chin chu an tihnawk thiang lo a ni, a ti a. Tihnawk lo turin an inbuatsaih a ngai takzet a ni tiin quarry bul hnai vel an thenfai loh avanga mipui harsatna tawh hrang hrang a sawipui a ni.
He hun hi SDO(C) Kawnpui Muhammad Aaquib, IAS chuan a kaihruai a; kum tam tak kalta atanga mipui harsatna tawh thin leh sawrkar anga sutkian tumna kawng hmalakna hrang hrang a sawi a. Tun hnai-ah pawh tih ngei tur thil tul an lo inhrilh tawh thu a sawi nawn leh a ni.
Nimina sawihonaah hian karleh Nilaini, Sept 25 hian, SDO(C) Kawnpui hovin Lung quarry te chu a hmun enfiah tur a tih a ni a; chumi hma chuan Quarry neituten thenfai ngai zawng zawng lo thianfai tura tih an ni. Enfiah hunah Highway Reserve chin tih fiah a ni ang a; chutah chuan chhinchhiahna siam a ni ang.
He hunah hian NHIDCL hotute leh Contractor te an tel bawk a. DC chuan ruah sur a kiang tan a; hnathawhna hun tha a inher chhuak mek a; muang lova thawk turin a hrilh bawk a. Highway enkawltute chu lung chang tha bik State pawn atanga la lut turin thurawn a pe bawk.
Kolasib DC-in Lung Quarry neitute a kawm
