Kolasib Home ah ruihhlo
ngai enkawl lai 554 awm
Kolasib district-a home hrang hrangah ruihhlo vanga enkawl ngai mi 554 an awm mek a, kumin chhungin ruihhlo kaihhnawihah an district chhungah mi 5 man an ni tawh.
Zirtawpni khan Kolasibah ‘District Level Task Force on Ruihhlo Do’ an thukhawm a, an district-a ruihhlo tih remna tura hmalak dan tur an sawi ho. He hun hmanpuitu Social Welfare minister Lalrinawma chuan ram leh hnam hmasawnna daltu lian tak chu ruihhlo a ni, tiin, chhungkua leh khawtlang zalen leh nuam siam tur chuan ruihhlo do a pawimawh tih a sawi. Sawrkar hmalaknaa ruihhlo do hlawhtling tur chuan sawrkar, kohhran, tlawmngai pawl leh khawtlang hruaitute thawhhona a pawimawh tih a sawi a ni.
Thutkhawmah hian kumin chhunga Kolasib, Kawnpui, Bairabi, Vairengte, Bilkhawthlir, Saiphai ah zirlai 2506 hnenah ruihhlo that loh zia inzirtirna pek a ni tawh tih sawi a ni a. Kolasib district-a ruihhlo ngai enkawlna Home hrang hrangah ruihhlo vanga enkawl mek 554 an awm mek a; kumin chhungin ruihhlo kaihhnawihah mi 5 man an ni a, ruihhlo cheng nuai 16 chuang hu man a ni tawh. Excise & Narcotics Department bikin rakzu litre 1788, a senchi um puitling 7191, beer can 3876, heroine kg leh Methamphetamine gram 734.78 man a nih tawh a; NDPS Act 1985 hnuaiah case 18 leh MLP Act 2019 hnuaiah case 1754 ziahluh a ni tawh.
District Level Task Force on Ruihho Do thukhawm hian zirna in leh kohhran program-ah ruihhlo that lohna leh ruihhlo laka fihlim tura inzirtirna kalpui rel a ni a. Zirtirna pe turin resource person ruat a ni. Anti-Drugs Club din a tul thu leh veng tin ah ruihhlo do kalpuina’n Village Level Committee din a tul thu sawi a ni bawk.
Kolasib Home ah ruihhlo ngai enkawl lai 554 awm
