Kolasib town chhunga national highway kawngpui chhe zual lai chu Thawhlehni khan Kolasib Joint Action Committee chuan an president Lalmalsawma hoin an tlawh a, NHIDCL engineer-te an tel.
Thudawn danin, JAC hruaitute leh NHIDCL engineer-te hi kawng chhia chungchangah hian inhmuthiam lo deuhin, boruak a tang deuh a, mahse thil thalo a thleng zui lo.
Thawhtanni khan Kolasib Gosen veng, Tuithaveng leh Hmawngkhawthlir hmun an tlawh a. NHIDCL contractor-ten chhuanlam hrang hrang neiin, kawngpui tui tam zualna chu a chhiat hma bik tih an sawi a ni.
Hei hi JAC hruaitute chuan an pawm lo tih sawiin, kumin February 16-a inremna leh intiamkamna an lo neih tawhna chuan zawm a hlawh lo chu an hrethiam loa, na zawka hma lak tum a ni tih an hrilh. Tunhmain thla ruk em pawh daih loa kawngpui siam tlo lo an la hre ngai lo tih sawiin, NHIDCL-in NH-306 & 06 a hna an thawh atang hian Mizoram kawngpui an tlo lo zual a, hriatthiamna an neih thin chuan tiamchin a pel takzet ta tih an hrilh a ni.
NHIDCL hian Tuithaveng Community Hall bul phei kawng chhe lai chu vawiin – August 12 atang hian siam tan an tum tih an sawi a. Hmawngkhawthlir leh Thingdawl inkar kawng pawh theih ang angin siamthat an tum tih an sawi.
NHIDCL engineer-te hian kawngpui hi pavement quality concrete (PQC) a siam turin approval dilin Delhi lamah NHIDCL general manager a thang mek a; approval an neih veleh chak zawka hma lak an tum a, nakum May hmain Bilkhawthlir leh Kawnpui inkar chu siam zawh ngei a ni dawn tih sawi bawk.
Kolasib kawngpui siam dan enfiahtute boruak tang deuh
