August 9 a Kolkata a RG Kar Medical College and Hospital a kum 31 a upa doctor hmeichhia pawngsuala thah a nih zui duh lova Kolkata-a state secretariat Nabanna thlenga lungawilohna kawngzawh neihnaah buaina nasa tak a chhuak a.
Riot police te chuan tear gas leh water cannon hmangin lungawilo tena state secretariat an pan tur dan tuim hma an la a, lungawilo te chuan police te chu lung leh remchangin an bei ve thung.
Kawngzawh phalna pek an ni lo va, rorel lai Trinamool Congress te chuan rally ah inphiarrukna a tel tiin an sawi a. Kolkata Police te chuan Nabanna chu kulh ang maia siamin police personnel 6,000 chuang dah an ni a, lungawilo tena secretariat an luh an remti lo a ni.
College square atangin lungawilote pungkhawmin Nabanna lam an pan a. Chief Minister Mamata Banerjee chu bang turin an ngiat bawk a. Lungawilohna hi student organisation leh citizen forum hrang hrang ten an thlawp a ni bawk.
Ruling Trinamool te chuan lungawilohna lantir chu BJP te thlawp tia sawiin organiser te chuan student organisation te ruahman an ti ve thung. Leader of Opposition Suvendu Adhikari chuan student activist pali te chu zanlaiah hruai chhuah niin an chin hriatlohin an awm mek tiin a sawi zui bawk a.
“Mamata Police tena an man leh hren an ni thei a. An chungah thil duhawmlo a thleng a nih chuan Mamata Police te mawhphurhna a ni ang” tiin Adhikari chuan a sawi.
Bengal Police te chuan zirlai hruaitute chuan kawngzawhna neihnaah tharumthawhna liantham thlentir tumin ruahmanna an siam tia sawiin phiarrukna leh tualthah tumna kaihhnawiha inhnamhnawih an ni ti thungin chuvanga man an ni a, an chhungte pawh hrilh hriat an ni an ti ve thung.
Trinamool te chuan kawngzawhna chu zirlai te lungawilohna behchhana buaina siam tumna tiin an sawi ve thung a. A hma niin State minister Chandrima Bhttacharya chuan, “BJP-ABVP tena buaina siam an tumna ruahmanna a ni. Criminal ten police uniform hmanga silai hmehpuah an tumna a ni a. Naktukah exam a awm a, zirlai te inhnamhnawihna chi a ni em? Vulture politics an kalpui mek a ni” tiin a sawi.
Kolkata kawtthlerah lungawilohna
