Kolkata khuaah Brazil fotball team kan hmu mai thei
Brazilian Football Confederation (CBF) chuan kumin October thlaa Kolkata khawpuia an national football team inkhelhtir turin inbiakna hmasa an kalpui mek tih an puang.
Kolkata match hi Fifa World Cup 2026 hnu lama ram leh ram inkhelh hun (Fifa international break) hmasaberin a ken tel tur niin, India lam an rawn hawi hmain Brazil hian September thlaah Australia chu friendly match vawi hnih an khelhpui phawt dawn a ni.
Kolkata match atanga India mite leh CBF inbiakna hi kan hnung lawk Fifa World Cup lai atanga kalpui tan tawh niin, Kolkata khawpui leh a chhehvel hi Brazil fans tamna (Brazilian fan base) a nih avangin he inbiakna kal mek hi a hlawhtlin ngei pawh a rinawm viau a ni.
Brazilian Football Confederation chuan kumin World Cup hnua Fifa international break hmasaber atan ruahmanna siamin, September-October chhung hian friendly match vawi thum khel turin an rel a, pahnih chu Australia lamah niin, inbiakna kal mek Kolkata hi a pathumna tur chu a ni.
Australia nen hian September ni 25 khian Townsville-ah intumin, ni 29-ah mualneitu team chu Brisbane-ah an infiampui leh dawn a; CBF chuan an third match hi Kolkata an rawn tinzawn mek a, October thla tir lam a nih a rinawm thu ESPN chuan a puang.
India bakah Bangladesh, Qatar leh Singapore pawhin five-time world champion mikhual hi an tum ve mek bawk a, mahse, Kolkata lam hian an chan zawk hmel.
South American team Brazil hi kumin World Cup-ah khan round of 16 stage-ah Norway hneh loin an tlawm a, an star player Neymar Junior chuan mittui nen khelmual a chhuahsan a nih kha.
Kolkata khuaah Brazil fotball team kan hmu mai thei
