Daily Newspaper

Kremlin in Alexei Navalny tûra hraia puhna hnawl

13

Kremlin chuan President Vladimir Putin chuan amah sawiseltu ber Alexei Navalny tûra hrai turin thu pek a pe tia puhna chu a hnawl.

Kremlin thupuangtu Dmitry Peskov chuan puhna chu dawt a nih thu leh ngaih thutak chi a nih loh thu a sawi a.

Navalny enkawl mek tu German doctor te chuan Navalny chu tûra hrai ngei nia an ngaih thu an sawi chu Peskov chuan eng vanga thutlukna siam rang lutuk nge an nih a zawt let a ni.

Navalny hi kar kalta Ningani khan Tomsk atanga Moscow pana a thlawh laiin a damlo thut a. Amah thlawptute chuan Tomsk airport-ah a thingpui inah tûr telh niin an sawi a ni.

Putin hmelma ber thlawhna hi Moscow a pan mek laiin Omsk lamah thlawh kawitir niin doctor ten nithum an enkawl hnuah Berlin-a Charite hospital panpui a ni ta zawk a. A dinhmun a la tha lo chungin nunna chan hlauhawm erawh a nih loh thu Berlin doctor te chuan an sawi.

Russia lower house parliament speaker Vyacheslav Volodin chuan Russia ram chhung tihbuai tumin he thilah han ram dang inrawlh an awm tih finfiah turin committee dina investigation neih a nih tur thu a sawi nghal bawk.

Kum 44-a upa Navalny hian official corruption lailangin a larpui hle a, Putin a United Russia chu ‘bumhmang leh rukru party’ tiin a sawi. Jail-ah tum tam tak dah luh a ni tawh bawk.

Tun hma atang tawhin President Putin sawiseltute high-profile critics, intelligence officers leh journalists te beihna a thleng ko tawh a, Kremlin chuan a hnawl ziah thung.

Kremlin-in Eng nge a sawi?
Peskov chuan President Putin inrawlh anga puhna chungchangah, “Hetianga inpuhna kan la thutak thei lo. Dawt muhlum a nih vang a ni a. Bengchheng awmze nei lo niin lak thutak kan tum lo,” tiin a sawi.

Navalny thupuangtu Kira Yarmysh thung chuan, “He thilsual tih hi chhui chian tak tak ni lovin a titute man an ni lo dawn nachungin kan vaiin tu nge a titu kan hre vek a lawm,” tiin a sawi.

Pekov chuan Russian leh German doctor te endikna a inang ve ve a ‘thutlukna an siam a inang lo thung’ tiin a sawi a.

“Eng vangin nge kan German thian te hian thutlukna rang taka an siam kan hrethiam lo. Tûra hrai a nihna tur finfiahna a awm lo,” tiin a sawi.

German Chancellor Angela Merkel chuan Russian investigation kimchang tak neih ni se a duhthu a sawi a. UK pawhin langtlang taka investigation neih a phut thu a sawi bawk. Hetihlai hian peskov chuan tûra hrai ngei tih finfiah a nih chuan investiagtion kalpui theih a nih thu a sawi.

Navalny dinhmun?
Intensive care ah artificial coma a dah mek niin Charite hospital te chuan ‘clinical evidence an neih atangin tûra hrai nana hman hi cholinesterase inhibitors group a mi’ tiin an sawi a.

Mahse, a substance nihna chiah an la hrefiah thei lo thung a. Heng inhibitors te hi Alzheimer natna vei te enkawl nana hman thin niin nerve agents atan pawha hman thin a ni bawk. Taksaa enzyme pawimawh dangin chu chuan tha, a bik takin thawk lam puitute chu a ti phui thei ta thin a ni.

Navalny hi atropine hmanga enkawl niin Kremlin chuan Russian doctor te pawhin cholinesterase level hniam hmu in atropine an pe ve tho va, mahse, tûra hrai a nihna an hmu lo tiin a sawi.

Navalny nupui Yulia chuan Russian doctor te chuan German-a enkawl tura ngenna chu tikhawtlai luiin chemical substance te a reh hman an nghak nia hlauhthawnna a neih thu a sawi tawh bawk.

Putin sawisel tu te?
Putin sawiseltu langsar tak tak te tûra hrai mai piaha vanduai an awm nual tawh. Chung zingah chuan politician Boris Nemtsov leh journalist Anna Politkovskaya te pawh telin an pahnih han kahhlum ve ve an ni.

Intelligence officer Alexander Litvinenko chu kum 2006 khan UK-a a awm laiin a thingpui in turah tûr radioactive polonoum-210 pawlh a nih avangin a thih phah tawh a. Journalist leh opposition activist Vladimir Kara-Murza pawh tûra hrai a ni tawh a. Kremlin critic Pyotr Verzilov pawh kum 2018 khan Russia intelligence service tena tura an hrai thu sawiin court hearing neihnaah a damlo thut a, a mit del zuiin a tawng thei lo zui a ni.

He mi kum vek hian Russian double agent Sergei Skripal leh a fanu te chu British city Salisbury ah Novichok nerve agent hmanga tûra hrai an ni a. United Kingdom chuan he thil titu hi Russia GRU military intelligence service mi leh sa an ni a ti a, hei hi Kremlin erawhin a hnawl thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy