Daily Newspaper

Krismas dawnah zin veivak tlem

11

Zoramah chuan Krismas hi “hunpui” a ni a, December thla hi zin veivak an pun thla a ni. Mahni khuaa Krismas hmang tura hawte leh khawpuia chiseh leh eng ilo lama zinte avangin zin veivak an pung thin. Kumin erawh chutiang a ni lo a, zin veivak an tlem hle.

Kuminah lirthei an chawl thuap a, Mizoram Maxi Cab Owners Association hruaitute’n an chhut danin, Mizorama tlan (service) a tam zawk chu an chawl a, hmun thuma thena hmun khat vel tunlai hian an tlan.

Aizawl leh Lunglei inkarah lirthei 70 vel an tlan thin a, Krismas dawnah phei chuan mipuiin an inchan loh avangin lirthei hi an lehlang hial thin. Kuminah erawh 10 vel an tlan a, a tlante pawh hian phurh tur an hmu mumal lo.

Aizawl chhehvel khua, lirthei 10 chuang tlan thinnaah pawh lirthei an tlan meuh lo tih an sawi a, lirthei 15 vel tlanna khuaah pawh lirthei pahnih pathum lek lek an tlan tih an sawi.

Maxi Cab Owners Association secretary Sailova chuan: “Kumin chu zin veivak an tlem a, kan eizawnna pawh a nghawng a, hetiang a nih chuan eizawnna dang dap mai a ngai dawn a ni kan ti hial a ni,” a ti.

Kum dang leh kumin a khaikhin a; kum dangah chuan December thla chawhnu lama mi tur hi November-a hauh (book) te a ngai thin a, mipuiin ‘seat’ an indaih lo thin. Kuminah erawh lirthei tam zawk an ding a, a tlan chhunte pawh an intlan chhawk a, an inkian thin.

Khaw hrang hrangin Aizawl an hlau a, khaw dang atangin an khuaah mi lut lo se an duh bawk a, chuvangin zin veivak an tlem tih chu an thlir dan a ni. Kuminah inkharkhip te a ni fo a, hna a kal mumal loh avangin khaw danga hnathawka awmte mahni khuaah an lo haw sa bawk a, chu chu zin veivak an tlem chhan a ni, an ti bawk. Thingtlang atanga khawpuia zin pawh an tlem an ti bawk.

Maxi Cab Owners Association hian Aizawla an office pawh an khar tawh a, ‘Lirthei a tlem a, min mamawh lo,’ an ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy