Daily Newspaper

Krismas leh Kumthar Chibai

9

Coronavirus pandemic avangin kum 2020 Krismas chu dan pangngai angin kan hmang thei dawn ta lo niin a lang a. Hetih lai hian, hrileng tawrh kawngah India ram state zingah chuan Mizoram hi a tuar nep pawl kan ni a, Pathian kaihhruaina duhawm tak kan chang a, hei hi a lawmawm hle. Ram hruaituten ruahmanna fing leh fel tak an kalpui hma avang leh, sawrkar thuchhuak mipuiin an zawmthat avanga he dinhmun hi thleng thei kan ni tia sawi theih a ni bawk awm e.

A tir lama chhutmiten Mizoram chhunga hrileng dinhmun an lo chhut lawk leh an lo sawi lawk ang chuan December thla tawpah hi chuan hrikai hi alo berah 5000 vel tling ve hman tura ngaih a ni a. Mithiamte hian an chhutlawk thiam angreng hle a, nimin December ni 21 thleng kha chuan Mizoramah hrikai 4124 an awm a, Decemebr thla ralna turin ni 10 a la awm a, tuna Mizoram Covid-19 statistic-a positive rate ang hi chuan December thla tawpah hian 5000 hi thleng lo thei kan niin a lang.

Eng pawh ni se, englai pawha boruak hi inlumlet thut thut thei a nih avangin, tuna positive tlahniam chho mek hi inthlahdah nana kan hman palh hlauh chuan, kan boruak hi inthlak duai thei reng a ni tih kan hriat erawh a pawimawh dawn hle niin a lang.

Ram thenkhatah chuan he hrileng hi a hluar chho leh mek a, hri thar te pawh a lo chhuak leh tawh nia sawi a ni a. Wuhan atanga khawvela hri darh chak dan kha kan lo tawnhriat tawh a nih avangin, khawvel letliama thil thleng pawhin kar lovah min rawn thlenchilh zung zung thei tih a lang reng a ni.

Krismas hun hi tunhma anga kan hmang thei ta lo a nih pawhin, a dam hauh hi a pawimawh ber a, tuna kan tawrhnate hi nakin huna kan that tlanna zawk tur a nih ringin, inthlahdah lova fimkhur taka he hun hi kan hman thiam a pawimawh dawn hle a ni.

Mahni awmna hmun theuhvah hlim leh damtlang taka Krismas hun hmang theuh turin The Aizawl Post chuan chhiartute zawng zawng Krismas Chibai kan buk che u a, kumthar hlimawm tak hmang theuh turin duhsakna kan hlan nghal a che u.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy