Daily Newspaper

Krismas pualin a thlawna thisen pek runpui nei

19

Association for Voluntary Blood Donors (AVBD) Mizoram leh Model Blood Bank Aizawl Civil Hospital țangdun buatsaih ‘Krismas Pual – A Thlawna Thisen Pek Runpui’ chu Thawhlehni khan Civil Hospital Aizawl Blood Bank-ah neih a ni a. District hrang hrangah pawh neih a ni.

Aizawla he hun hawnna hmanpuitu Health & Family Welfare Board vice chairman Dr ZR Thiamsanga, MLA chuan sawrkar laipuiin inkaihhruaina dan a siamah Civil Hospital Aizawl Blood Bank-ah hian thawktu 34 awm tur a nih laiin tunah 17 chiah an awm a, a tam zawk chu a nghet loa thawk an la ni, tiin, an indaihlohna sawrkarin a hriat thu leh an harsatna sukiang tura hma lak mek a nih laiin, Covid19 a leng ta thut si a, hmalak chhunzawm theih a ni ta rih lo tih a sawi.

Civil Hospital Aizawl Blood Bank hmang țangkaitu Aizawl khawpuia private hospital hrang hrangte chuan Blood Bank hnathawh tihchak lehzual a nih theih nan technician rawihna tur thla tin Rs. 50,000 thawh an tum thu Dr ZR Thiamsanga hian a sawi a. Midang nunna chhanna tura thisen a thlawna pe țhintu YMA, kohhran, mimal, leh pawl hrang hrang chungah lawmthu a sawi bawk.

AVBD president C. Lalnunnema sawi danin, hun engemawchen kumtin Krismas leh kumthar pualin a thlawna thisen pek runpui an buatsaih țhin a, a chhan chu, kumtinin Krismas leh kumthar vuakvet lai hian thisen petu an tlem țhin a, chutih laiin thisen mamawhtu an pung zawk mah emaw tih tur a ni thung. Tlawmngai pawl leh kohhran bakah pawl anga thisen pek hun buatsaih a remchan țhin loh vangin AVBD chuan Blood Bank țangho chuan beiseina sang tak nen Krismas puala thisen pek runpui hi an buatsaih țhin tih a sawi.

Kum 2019 khan AVBD buatsaih Krismas puala thisen pekah Aizawl Civil Hospital Blood Bank-ah unit 458 leh Synod Hospital Durtlangah unit 69, a vaiin unit 527 pek a ni.

An thil tum ber chu Mizorama thisen pek zawng zawng hi a thlawna pek (100% voluntary donation) nih tir a ni tih AVBD Mizoram hruaitute chuan an sawi a. 2019-2020 khan VBD percentage hi zaah 90.91 a ni a, kum kal mek (2020-21) April – October chhungin zaah 91 (14882 ah 13574) a ni tawh tih an sawi.

A thlawna thisen pek runpui hi December 1-30 thleng neih a ni dawn a, kum dang ang loin kuminah hian District Blood Bank dangah pawh AVBD Branch hrang hrang nen țangrualin buatsaih a ni. Nitin chawhma dar 10 ațanga chawhnu dar 2 inkarah a thlawna thisen pe duh tan district tina blood bank-te an inhawng dawn a ni. College leh higher secondary school hrang hranga NSS volunteer-ten hun insiamremin thisen hi an pe dawn a, an ni bakah hian mimal leh pawl angin thisen a pek theih reng bawk.

Thawhlehnia a hawnna ni-ah hian hriat theih chinah Mizoram hmun hrang hrangah a thlawna thisen pe 69 vel an awm a. Civil Hospital Aizawl-ah unit 38, Champhai Hospital-ah unit 19, Mamit Hospital – unit 9 leh Kolasib Hospital-ah unit 3 a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy