Kumin Youth Icon-a boruak lian ber te zinga mi J Lalrosanga chu Icon Top 4-ah inhlangkai zo ta lo mah se rimawi khawvelah a hming a chher tawh a, Zoramin a hmelhriat tawh tlat a, a rahbi a tuk fuh dawn niin a lang. Tunah hian zai tura sawmna a dawng nghal mawlh mawlh a, kumin Krismas thleng hian a programme a khat a ni deuh ber tawh a, ni khatah hmun khat aia tam zaina tur a ni deuh fur lehnghal. Tichuan, karleh mai hian state pawn, Pune lamah an chah thla nghal bawk e.
Rosanga hi Youth Icon grand finale stage-ah a perform leh a, Elvis Presley mitthla a lang nghal uar uar thei turin savun jacket dum a hak chu a nghawng a’n pawt tung a, a sam tihdan leh stage-a a chet vel dan thlengin a mood a dik tlat! Icon ni lo mah se Mizo rimawi khawvela dinchhuahpui tham huhang a nei tih a hriat e.
Rosanga hi a fan-ten pawisa thawh khawmin motorcycle thar, Honda CB 200X an lei sak a, chu chu a hlanna hun an hmang nghal. He motorcycle leina hi fans group hrang hrangin an thawh tling khawm atanga an lei a ni.
WhatsApp-ah Rosanga fans group hi official-in pasarih a awm a, chu chu Admin 10 velin an enkawl a, hei bakah hian official ni lo fans group dang a la awm neuh neuh bawk. Rosanga hian fans group member ten a puala pawisa an thawh khawm atanga an sum pek chu Muanna In-ah a hlan vek a, hemi hnuah hian motorcycle leina tur sum thawh khawm chungchang hi group-ah an tharthawh leh ta a ni.
Rosanga buaipuitu, a u chuan Top 10 a tlin khan home-ah naupang te sweet an lo sem tawh niin a sawi a, fans group atanga an sum dawn te pawh an unaua an sawi dun hnuah charity a pek hi tha an tih tak thu a sawi bawk. Rosanga tlak danah an rilru a dam tih sawiin, “Kan ui khawp mai, mahse, ama chetsual vang a nia, kan pawm thiam khawp mai,” a ti a. Icon tel tura hming an pek luh pawhin hetiang dinhmun hi thlen phak an inring lo tih sawiin, “Hla thu theinghilh tih vel hi a chak lohna a nia, tun tum Icon-ah pawh hian hetiang thleng thleng hi kan beisei pha lo. A tirah pawh a thianpa nen serious vak loin an kalpah ve deuh deuh mai a, mahse, rin loh takin ‘Fuh chiang lo maw’ kha a hit pui ta a ni,” a ti bawk.
Rosanga te hi vawiin hian an khua Tuidam lamah a haw tawh dawn a, Aizawla Tuidam khawchhuak awm te ruahmanna kal tur niin, an haw nan hian bialtu MLA-in motor pahnih a pe a, Tuidamah hian a khaw nawtin an lo hmuak dawn a ni.
Krismas thlengin Rosanga programme a full deuh der!
