Daily Newspaper

KRISMAS Vrs COVID-19

10

Z.D Lalvunga, Journalist Aizawl

Kum pui sul a lo vei leh dawn ta. Kum dang ang chu ni sela, Aizawl Bazar leh hmun tinah kan innek buai leh hle tawh ngei ang le..!! Hei mai bakah, khaw tin hmun tin leh veng tinah Krismass “Urlawk” inti ten a pianna lam hawi map lo hla an tuipui leh vek bawk ang.

Tunah pawh Coronavirus Pandemic chu ni lo sela chuan tiin Krismas an lo urlawk ang te kha an suangtuahin, “an mit thla” ngei ang le. Krismas hi chuan Mizote rilruah hian boruak a siamin thingtlang khaw chengker berah leh current thlen phak lohva cheng te, hmun hla taka taka mahni khua awmbosan te pawh “I will be home for christmas” tiin mahni khua ngeiah rem leh rem lovin mahni khua panin an phili buai leh tawh ngei ang. Mahse, thil theih a ni ta tlat lo, “Because of Covid-19” kum dang ang chu ni sela kohhran hrang hrang ten programme an duang lawk leh ngei ang le! Hemi rual hian, nula/tlangval ten kohhran Programme piah lamah Agenda dang neiin, “Advance Christmas” tih changchawiin Remna Lal piancham theihnghilh vekin, Pop leh Rap music- hmangin a fal thei ang berah nuam tawl an tum leh ngei ang le! Mahse, Covid-19 hian an chungah ro a rel ta tlat mai a nih hi. Hei hi khawvelah sawisel thei leh palzut an awm si lo chu a nih hi.

LENG SENIOR:
Tichuan, krismas boruak chuan mitin te min khawih miau si a, nula/tlangval senior thenkhat kohhran thalai pawla “Over” tawh, mite fiam ngam tawh lem loh; “Duh ve tho si” K’u TZi- te ang torchlight cell-5 nei ngat chin, Masi hmanpui tur haihchham, K’u Hruaia te ang ho chuan chauhthubarawh atan Ramthim lama fehchhuah a tul thu an sawi mawi ve thung ang. Chutih rualin interekpui tur nei tan Work Camp lam an sawi chiam ang a, leng senior te tan ngaihthlak a nuam lo leh hle ang a, a mal te tein an bibo fai leh vek ang a, mahse, chhuanlam leh inhnem nan “Covid-19” hi theihpatawpin an sawi ri ve tawh mai dawn a ni.

Programme inpersan:
Krismas kan hnaih zel a, vengchhung tlawmngai pawl YMA, VDP, JAC etc. lam erawh chuan, mahni veng theuhva “Over Polite” ho savawm bawma khungkhawm tur an zawng leh dawn a, chutih rual chuan Covid-19 hian a rawn luahlan (Over rule) ta si a. Rul inlip angin “Task Force” ah an chang fai vek tho dawn a ni. Nuam tawl tuma vak darh te khapbeh chu, hman ngam chi a ni tawh dawn lo a ni, ‘Because of Covid-19’.

KHAWCHHAK MIFINGTE:
Khawvel chhandamtu lo piang hi khawchhak mifingte khan hriain thangvana Arsi eng chu rawn zuiin a pianna ranthleng chu an rawn thleng a nih kha. Mahse, tunlaia kan khawchhak mifing te erawh hi chu, “Sumdawng” an ni ta daih mai. An robawma rimtui an rawn ken te chu, ‘pseudo ephedrine’ ah a chang daih tawh, hriak rimtui modify hi birthday neitu hian pawm lovin Covid-19 hmangin a lo hnar ta niin a lang.

TLUIN CHIBAI AN LO BUK A: Tichuan, kan MLTP- Act an hlih avanga nunmang hre lova kawngsira let reng te tan chungpikna atan sorkar chuan Total Prohibition a rawn thar thawh leh hmiah mai a, Covid-19-nen an tangrual ni berin a lang. Covid-19 hma lama Lal thar lo piang kan lo lawm thin dan ang kha chuan Lal Heroda chibai bukna nen khan a danglam hauh lo a nih thin kha.

Khatiang kha kan Krismas hman dan thin chu a ni a. Kan chhehvela, ringlomi, hnam dangte mithmuha kan chet thin dan a ni miau va, kan ruihtheih leh drugs keng reng chunga Lal rawng kan bawl thin avangin tunah hian chunglam thununna (Control order) kan dawng ta tih hi kan pawm loh theih loh a ni ta a ni.

Kan khawchhak mifingte rimtui rawn ken ruihhlo chi hrang hrangte hmangin, keini nula/tlangval/nu thenkhat leh pa thenkhatte chu kan lo intulh rui a, chu chuan thatchhiatna leh dawngdahna a rawn hring chhuak a, engmah kan pawisa lova, tualcharah a hmei a pain kan thal pheng phung a, “uluk takin bawkkhup chungin i luak dun ang” tih hla ang maiin. A then zangthalin, a then bawkkhupin chibai kan inbuk thin a. A then lirtheiah kan chesual ang a, a then khum laizawlah, a then lamlianah leh daiah te. Chutih rualin, “thlarau thianghlim chenchilhna kan beisei theuh si ang.” hnai love… Covid-19 hian a chenchilh ang che. Ka zilhhauna che hi i tan a tawk e…!! tih hi i pawm ngam mai ang u.

Hetiang hunah kha chuan biakbuk pana kal leh zaikhawm te thung chu, an tlemin khawvar lam arsi ang mai an ni leh thin a ni. Nula/tlangval biakbuk pana kalte chu “Interek” pui tur nei lo leh tarchak lo te te an ni thin a ni. Kohhran upa, zaikhawma nupui fanau hruai thei te chu, kum leh a, “Upa thlan” lo awm tur thlir lawk ran chunga zai tui chawp mai an nih thin kha. Tichuan, Masi kan hmang zo chiah chu nula/tlangval senior Interekpui hmu zo lo ho khan, kum hlui thlahna thlirlawk ranin thathar thawhin tan an la ve leh ngial ang a, Jean kekawr tawt zet zet inbelin, anmahni ang bawka “Haihchham” te an melh kual leh dawn a ni.

Chutiang pawhin a haihchham leh thovang. Thlarau thianghlim pawlna chu sawi loh, tute pawlna mah an dawn leh dawn loh avangin, khawdanga an chhungte chhawmdawla awmbo daihna “Project” an duang chhuak leh mai dawn a ni. Ti fuh tak ang mawle….!!!

NU LEH PA TE LAM:
Kan hunpui Christmas leh New Year kan hmang zo tihah an tu leh fate tana hun rei tak atanga an intuah khawlsa leh inbuatsaihna chuan a vawrtawp a thlengin kan til tiak chiah ang a; “Khawram chhimbuk” an sawi ang maiin an hawi vel leh mai mai dawn a ni. “Hlimna hi ropui chu a eng” tih hla tui taka kan sak chu, “Zantiang hi kawlrawnah a liam” tiin kan zo leh ang a, kan “Ro” leh hle hlawm dawn a ni.

Thifa hnukchata kan khawlsa te chu kan tu leh fate tan kan khawhral vek hlawm tawh si a. Chutih laiin, kumthara naupang school admission te, text book, uniform leh monthly fee etc a lo ngai leh bawk nen, mi inluah leh, michhe daikil kar ami te tan pawh pumpelh theih a ni hauh si lo. Nu leh pate mangang chu an kun leh tlawk tlawk mai dawn a ni.

Kan hunpuiah kan inhmang ral vek tawh tih nak alaiin, tlema kan hmachhuan ve chhun, kan ran vulh ve te lah chu, eng eng emaw avangin, ‘a pul/thifai leh deuh vek bawk vei nen. Nu leh pate mangang chuan chhungkaw ro an han rel ve bawk a, ‘An inrel ro’ hi a ni ringawt mai si a. “Aw chatuan khua lo var tawh rawh” an ti vawng vawng mai chu a ni ber mai.

“Pachhe kum tiam” an tih ang maiin, “Nakum chu aw…” han ti ngawt mah se, rahbi a tleu laklawh tawh chuan, tih ngaihna a vang thin hle zawng a nih hi. Hetiang hunah zet hi chuan, K’u Natlua (Pu Vanneihtluanga) leh K’u Liandinga (P.L Liandinga) te meuh pawhin chal dawmin, “Kher lo” tih leh “An ti” tih column an buaipui hman bik hauh lovang le…!!

Heroda Vs Hmeichhiate:
Tin, heti hi a ni a, zantlai khawthiang kara Krismas leh New Year uchuak taka kan hmanna rah (result) chuan min rawn nangchingin, kan duh emaw duh lo emaw kan hmachhawn ta thin a nih kha. Mahni felna leh, “Christ” viau vang pawh ni lem lo, luck loh vanga fihlim ve tlat te, hamthatna hun a lo thleng, kan tihsak thei bawk ang chu. Tlu-a chibai an bukna chuan, ‘Thla’ a lo tling ta mai si a. Hetah zet hi chuan, doctor te tan hun duhawm, sum malsawmna a lo thleng ve ta a.

Kan hospital hrang hrangah mahni hming leh veng dik tak te chu sawi loh, nu leh pate hming dik lo hmanga nau tihtlak (Abortion) na register chu Lal Kaisara huna chhiarpui neihna hming ziahluhna registration book chuan keu a hlawh leh hle thin a nih kha.

Hei ai mah hian Private Clinic te chu a lun thin a ni. |henkhat office kai leh hnadang thawk, kal paha “Abortion Register”-a in ziaklut pawh an tam thin em kha…!! mite hriat lohva chhandamtu lo piang chibai an bukna rah chu, mite hriat loh bawka sût leh (thupbo) a ngai tlat a ni.

Jeremia 2:34-ah chuan, “I puanfen ah pawh, mirethei pawi khawih lote nunna thisen a lang a” tih kan hmu a ni. “Lal Heroda’n a hriatin a manganpui a, mifingte a rawn a, Lal chibai buk tumin, a pheisen ral a khawm Judai ram vel ami”.. tih angin nausen pawisawilo amah aia Lal tur chu nasa taka zawngin kum 3- chin kha a that/rawt chiam a nih kha. Chutih laiin, kan hmeichhe thenkhat, bawkkhup leh zangthala Lal chibai an bukna rahchhuah chuan doctor-te an berawn a, nausen thla 3 chin chu an rawt/that ve ta chiam mai a nih kha.

Lal Heroda-chuan kum 3 chin hnuailam a rawt/that a, kan hmeichhe thenkhat te erawh chuan thla 3 chin te an that/rawt ve thung. Kan hunpui pahnih hman dan Advocate Senior Pu R. Thangkanglova leh ka thianpa Court Judge – K.L Liana (RIP) ten, “Hurlawkzan” an tih thin, “Masi tlaivar zan” leh “Kum hlui thlah zan” kan paltlang miau si a lawm..!!! tiraw K’u Sapdang..???

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy